Kolasib District chhunga MLA thlanna tluang taka neih a nih hnuin tukin zing dar 2:00 khan khaw hla ber pahnih Thingthelh leh N. Hlimen polling station atanga EVM te Kolasib thlenpui a ni a, tihian Polling station 76 atanga EVM te chu him takin an thleng kim ta vek a . EVM tehi uluk taka Official ten an endik hnuah strong room-ah kalh hnanin vote chhiar hma chu venhimna khauh taka dah a ni dawn a ni.

Tluang leh felfai taka inthlanna zawh a ni chu DC Pu Jitender Yadav, IAS chuan lawmawm a tih thu vawiin khan a sawi a. Mipui te chu Vote thlak duhna leh phurna duhawm tak an neih avangin Vote thlak percentage pawh a tha hle a, Sawrkar hnathawk duty te inpekna a fakawm a, NGO leh MPF te thawhhona te a ropui hle a ni, a ti a ni. Vawiin khan Kolasib District chhunga inthlanpui vila thutchilhtu Election Observer pangate chuan Kolasib an chhuahsan ta bawk a, anni pawh hian inthlanna muanawm leh felfai neih a ni chu an lawmthu an sawi bawk a ni.

Kolasib District chhung A/Consty pathuma Vote tlak dan chu : 4-Tuirial (ST) ah voter 15569 awmin 12422 in vote an thlak a, 79.79% a ni. 5-Kolasib (ST) ah voter 18934 an awm a, 15399 in vote thlakin 81.33% a ni. 6-Serlui (ST) ah voter 16627 awmin 13287 in vote an thlak a, 79.91 % tla-a chhut a ni. Kolasib District chhunga Vote nei zawng zawng chu 51130 a ni a, mi 41108 in vote thlakin 80.40 % tla a chhut a ni.