Mizoram State inthlannaa hotu lu ber Chief Electoral Officer Pu Ashwani Kumar, IAS chuan nimin ni 25/11/2013 -a Mizoram Legislative Assembly inthlanna Mizoram puma tluang taka neih zawh chu harsatna lian tham awm lova, boruak muanawm tak hnuaiah tluang taka neih a nih avangin lawmawm a tih thu a sawi a, Zoram mipui, Kohhran leh tlawmngai pawl hrang hrang ten inthlanna thianghlim leh felfai tak a awmna tura theihtawp chhuaha hma an lakna zawng zawngah lawmthu a sawi bawk. CEO chuan Mizoram puma inthlannaa duty Polling Party hrang hrang te chuan District Headquarters an thlen vek tawh thu sawiin an record te enfiah mek a ni, a ti. Vote thlak chungchanga fel lo tlema zawng report dawn te chu Election Commission of India hnenah thawn thlak niin an thu ngaihchan mek a nih thu te a sawifiah bawk. Hmun thenkhatah Voter invauna a awm tih thuthang awm pawh Police te intirin chhuichian a ni a, engmah man chhuah tur an hmuh loh thu sawiin vote tla pawh a that thu a sawifiah bawk.

VVPAT hman chungchang sawiin CEO chuan India rama inthlanpuia VVPAT hmanna hmasa ber chu experience tha tak a ni tiin EVM rintlak a nih zia tarlang chiangtu a ni a, state danga inthlannaa ruahmanna siam dan turah te nasa takin min pui dawn a ni, a ti bawk. Kum 2008-a EVM hmanga Mizoram Inthlanpui ah khan vote tla 80 % vel a ni a, tunah hian 81.2 % vel a tlaa hriat a ni a, Postal Ballot te nen chuan 83 % vel a tlin beisei a ni a, Mizorama EVM hmanga inthlanpuia vote tlak that ber record kan neih a rinawm tiin CEO tawiawmtu Pu H.Lalengmawia, Jt. CEO chuan a tarlang bawk. Heng vote tlak dan record te hi tunah cross check mek a ni a, tlema zawng chuan a la danglam hret mai thei a ni. Inthlanna tluang taka neih a nih theih nana hma la tu zawng zawng Election Commission of India te, Election Department-a thawktu te, District tina Deputy Commisioner leh Superintendent of Police te leh official leh Zoram mipui zawng zawng chungah CEO chuan lawmthu a sawi bawk a ni.