Vawiin khan Kolasib District chhunga Fishery Deptt. hnuaia NLUP 2nd Phase beneficiary mi 157 te hnenah Sangha Dil khuahna tur pawisa Rs 50,000/- theuh sem a ni.

NLUP pawisa semna inkhawm Kolasib AMFU Hall-a neih hi Pu Laldawngliana, DFDO chuan a kaihruai a. Kolasib DC Pi Niharika Rai chuan khuallian niin a hmanpui a ni. Thu sawiin Pi Niharika Rai chuan, Kolasib District hian NLUP Ist Phase ah khan kan titha hle a. Fisheries Deptt hnuaiah mi 272 laiin Sangha dil khuapin eizawnna ngelnghet an neih phah a. An sangha tharte pawh an hralh tha hle a ni, a ti a. Kut hnathawktute Ni inelna-ah pawh khan Fishery hnuaia Bilkhawthlir North –a sangha dil siamtu chu lawman 2-na hial dawngtu a ni a. A khua angin Bilkhawthlir S chu pathumna a ni bawk te kha a chhuanawm takzet a ni, DC chuan a ti a. Tun tuma IInd phase hnuaia tanpuina dawngtute chu an pawisa dawnte a nihna tur taka hmanga rim taka thawk tura fuihin chhungkaw intun nunna hmanrua atana hmang ngei turin a ngen a ni.

Khual zahawm Pi Laltleipuii, Nodal Officer, NLUP Fisheries Deptt. pawhin thu sawiin NLUP hlawhtlinna chu beneficiary te in ni a. Mizoten Sanga Dil siam hlawkzia kan hre chho ta a, tunah chuan 4000 ha. a zau dil siam a ni tawh a. Bul tan tha ila, Dil tha taka khuap i tum ang u, tiin hma la tha lote chu 2nd instalment pek an ni dawn lo a ni, a ti a ni.

Pu Lalthanzuala, FEO, Kolasib leh Pu Laldingliana,( DFDO Rtd) ten Sangha dil khuah leh Sangha enkawl dan training an pe a. Beneficiary atangin zawhna te siamin mithiamte hian an chhang a ni.