3578/2023-2024

2024 Pawlkut thla ni 30: Kolasib District chhunga village council (VC) pali (4) - VC06015-Kolasib Diakkawn, VC06019-Kolasib Khuangpuilam, VC06022-Kolasib Rengtekawn leh VC06050-Vairengte-III-a general seat ruak pakhat ṭheuh hnawh khat tura by-election buatsaihah vawiin khan zing dar 7 aṭanga tlai dar 4 thlengin boruak muanawm tak hnuaiah vote thlak a ni a. Inthlannaa vote tlate hi vote thlak zawh hun tiam ral hnuah tih tur ṭulte tihfel a nih hnuah polling station hmunah chhiar fel nghal a ni.

15-Kolasib Diakkawn VC-ah vote awm zat 2,730 aṭangin vote 1,355 (49.63%) a tla a. 19-Kolasib Khuangpuilam VC-ah vote awm zat 1,166 aṭangin vote 746 (63.98%) a tla a. 22-Kolasib Rengtekawn VC-ah vote awm zat 1,059 aṭangin vote 744 (70.25%) a tla a. 50-Vairengte-III VC-ah vote awm zat 890 aṭangin vote 617 (69.33%) a tla a. Kolasib District chhunga VC pali-ah hian a pum puia vote awm zat 5,845 aṭangin vote 3,462 (59.23%) a tla a ni.

Kolasib Diakkawn VC-ah hian MNF (Mizo National Front) leh ZPM (Zoram People's Movement) te'n candidate neiin, vote tla 1,355 aṭanga vote 842 hmutu ZPM candidate Pu LP Lalramhluna chu tlinga puan a ni a. Kolasib Khuangpuilam VC-ah INC (Indian National Congress), MNF leh ZPM te'n candidate neiin, vote tla 746 aṭanga vote 314 hmutu INC candidate Pu Jimmy Lalnuntluanga chu tlinga puan a ni a. Kolasib Rengtekawn VC-ah INC, MNF leh ZPM te'n candidate neiin, vote tla 744 aṭanga vote 360 hmutu MNF candidate Pu John Lalnunpuia chu tlinga puan a ni a. Vairengte-III VC-ah INC, MNF leh ZPM te'n candidate neiin, vote tla 617 aṭanga vote 212 hmutu MNF candidate Pu Lalrinnunga chu tlinga puan a ni.

Kolasib District Election Officer Pu John LT Sanga chuan Kolasib District chhunga VC pali-ah boruak muanawm tak hnuaia tluang leh felfai taka by-election buatsaih zawh a ni chu lawmawm a tih thu sawiin, inthlan buaipuitute, MPF duty-te, political party-te, vote thlaktu mipui leh vote chhiar buaipuitu zawng zawng chungah lawm thu a sawi a ni.