Vawiin khan Kolasib a SIRD Extension Training Centre Gandhi Hall ah Community Resource Person te tana buatsaih Ran vulhna kawnga thianghlimna leh Rulhut beihpui thlak inzirtirna (Training on Livestock sanitation and Deworming) chu khar a ni.

Kharna inkhawm ah hian Dr.V Vanneihtluanga Veterinary Officer, Kolasib chuan Resource Person kalkhawm te chu Traning an neih chhung zawnga an zirna te chu a taka hmang tangkai turin a fuih a, ranvulh tu te zirtir leh chhawng chu Resource Person te mawhphurna pawimawh tak ani tiin ranvulhna kawnga thianghlimna leh damdawi pek chungchangah pawh ziritrna an dawn ang ngeiin awmze nei zawka an kalpui a beisei thu a sawi bawk. Dr.Vanneihtluanga chuan thianghlim taka ran vulh loh hian ran hrisel lohna a thlen a, mihring tan pawh a hrisel lo ani tiin ran tharchhuah (productivity) kawngah pawh nghawng thalo tak a nei thin a ni a ti bawk a, training chhung zawnga zirtirna an dawn te chu Kolasib District tana ran vulh na kawnga hmasawnna rahbi pawimawh a nih a beisei thu a sawi bawk a ni.

Training hi August ni 7 a neih tan a ni a, Kolasib District huam chhunga Community Resource Person 33 te hnenah zirtirna pek niin Resource Person te hian Kolasib District a Self Help Group hrang hrang hnuaia Farmer te hnenah zirtirna an pe chhawng ve leh dawn a ni.

Kharna inkhawm hi Pi Ramngaihzuali, District Functional Specialist (Livelihood), MzSRLM, Kolasib in a kaihruai a, he hunah hian Rulhut damdawi mum 7400, Tuisen pack 2040 leh Tricodherma pack 17 te chu Resource Person kalkhawm te hnenah hian semchhuah nghal a ni.