No.3097/2020-2020

Vawiin chawhma khan District Legal Services Authority, Kolasib district hmalakna in I&PR Conference Hall, Kolasibah ‘Mizoram Victims of Crime Compensation Scheme 2011’ hnuaia chhawmdawlna mi 16 hnenah hlan a ni.

Vawiin hun kaihruaitu Dr H Lalthlangliana, Deputy Commissioner, chuan “Chhawmdawlna semchhuah tur a awm hi a lawmawm rualin semchhuah a nih chhan ngaihtuah chuan a lungchhiatthlak hle a ni”, a ti a, dan hriat leh zawm a pawimawh thu sawiin,” Dan zawm thatna apiangah zalenna a pung thin a ni,” a ti bawk. Dan bawhchhetute avanga vawiin a heti zat chhawmdawl ngai an awm phah chu pawi a tih thu sawiin dan kan dah pawimawh deuh deuh theihna turin Sawrkar, NGO, khawtlang mipuite leh chhungtinin hemi kawngah thawhhona tha kan neih a pawimawh thu sawiin dan zawm chungchangah mahni mawhphurna theuh kan hlenchhuah a tul thu a sawi bawk a ni.

Kolasib district chhunga Mizoram Victims of Crime Compensation Scheme pekchhuahna ah hian Pi Lalrinpuii, Secretary, District Legal Services Authority in scheme chungchang sawi zauna hun a nei a, Kolasib District Legal Services Authority board member ten thu tawi sawina hun an hmang bawk a ni.

Mizoram Victims of Crime Compensation Scheme 2011 hnuaia chhawmdawlna hi District Legal Services Authority hnenah pawikhawihna a thlen atanga thla 6 ral hmain dilna thehluh tur a ni a, rawlkhawlhna avangin thla 6 dawng pawhsei leh theih a ni. He scheme hnuaia chhawmdawlna dil tur te chuan Police Charge sheet nen dilna hi an thehlut tur a ni a, Victim of Crime Compensation hnuaia committee din ten ngun tak a an ngaihtuah hnuah State Legal Services Authority hnenah dilna hi an thawn veleh thin a ni. He scheme hnuaiah hian pawikhawihna tuartute hian an tawrh nasat dan azirin chhawmdawlna sumfai an dawn tur hi then a ni a, thihna, ramtuileilo a awm phahna, inrukbona, pawngsualna leh zahmawh rawngkai a inchhaihnawmnahna, acid a intheh leh taksa intina zawng a pawikhawihna hrang hrang a huam a ni. Chhawmdawlna sumfai an pek chhuah thin te hi kum 14 hnuailam te tan chuan zaa 50 a tihpun thin a ni.