1307/2023-2024
Kolasib dated 28th July 2023: Vawiin chawhnu khan Deputy Commissioners' Office bultumin DC pisa tualzawl ah Kolasib District-in kum 25 a tlin lawmna hun buatsaih a ni a. Minister Pu K.Lalrinliana, Kolasib Assembly Constituency bialtu MLA chu khuallian niin Pu K.Laldawngliana, MLA, Tuirial Assembly Constituency leh Pu Lalrinsanga Ralte, MLA, Serlui Assembly Constituency-te chu khual zahawm an ni bawk. Kolasib District Silver Jubilee lawmna hun ah hian Kolasib district-a Deputy Commissioner lo ni tawh, Pu Dawngliana, MCS (Rtd.), Pu H.Lalengmawia, IAS, Commissioner, Home Department leh Pu Zoengsanga, MCS (Rtd.) te an tel a, Kolasib district chhung a Sawrkar office hrang hranga hotute, Kolasib District Demand Committee, Kohhran Hruaitu Committee, Kolasib District Village Council Association, All NGO Coordination Committee leh tlawmngai pawl hrang hrang hruaitute he hun ah hian an tel a ni.
Minister Pu K.Lalrinliana chuan Kolasib in district dinhmun a luah theih nana pawl hrang hrang hruaitute leh mimal inpe tak takte chung ah lawmthu sawiin heng inpekna bakah khatih hunlai a sawrkar a thuneitu Chief Minister Pu Lalthanhawla leh Pu Zosiama Pachuau, Minister-te hmalakna lawmawm a tih thu a sawi bawk a ni. Kolasib chu kum 25 lai District dinhmun a luah tawh angin district dangte tan a entawntlak, hmasawnna a awm theih nana mipui inlungrualna district ni zel turin duhsakna Minister chuan hlanin Mizoram luhkapui a nih angin Mizoram hmel timawitu ni zel turin kalkhawmte a chah bawk a ni. Ramri humhalh kawng a huaisenna nei tur chuan intodelh hmasak a ṭul thu Pu K.Lalrinliana chuan sawiin mahni inchhungkhurahte, khawtlangahte leh ram leh hnam tan, kawng emaw tal a ṭangkaina neih a pawimawh thu a sawi a, hmun hrang hranga zofate nen inunauna leh inpumkhatna ṭha siam a ṭul thu a sawi bawk a ni.
Pu Lalrinsanga Ralte, MLA chuan hripui leh ramri buaina avangtein Kolasib district chuan harsatna a tuar nasat bik thu sawiin hmasawnna hna thawk chhunzawm zel tur chuan ṭanrualna leh thawhhona ṭha siam a pawimawh thu a sawi a. District Headquarters mai piah lam ah khawpui pawn lam a thingtlang khua thleng pha, hmasana inkhairual a awm zel theih nan Department hrang hrang a mawhphurhna pawimawh tak tak chelhtute inpekna leh taimakna a pawimawh thu a sawi. Serlui AC bial chhung a zirna kawngahte, hriselna enkawl kawngahte, inkalpawhnahte hmasawnna a thlen mek thu a sawi a, mipui tan a theihtawp chhuah a rawngbawlna kalpui zel turin Sawrkar hnathawkte Pu Lalrinsanga Ralte chuan a chah bawk a ni.
Pu K.Laldawngliana, MLA chuan Kolasib district chu Mizoram tan a district pawimawh tak, mipui mamawh hrang hrang chawkluhna hmun leh kan ram luhkapui a nih thu sawiin District puitling ni tur a hun leh tha lo seng tawh zawng zawngte zahna chibai a buk a. District entawntlak, Mizoram hmasawnna tur a hmahruaitu ni zel turin kalkhawmte a chah.
Kolasib DC lo ni tawh Pu Dawngliana chuan Kolasib district chhung a Sawrkar hnathawk a awm mek te chu mipui rawngbawl tur a an mawhphurna ah theihtawp chhuah turin a chah a, Pu H.Lalengmawia, IAS chuan zirna uar a ṭul thu leh mahni hna ṭheuh rinawm tak a thawh a pawimawh thu sawiin Pu Zoensanga chuan Kolasib district-in hmasawnna hmel hrang hrang a hmuh theihna tur a Sawrkar hotute leh khawtlang hruaitute hmalak ṭhinna ah lawmthu a sawi bawk a ni.
Pu John LT Sanga, Deputy Commissioner chuan kalkhawmte lawmna thu sawiin ni 10, September 1998 ah Kolasib district chu Deputy Commissioner in a ṭhutchilh ṭan thu a sawi a. State ṭhenawm nen ramri thui tak inṭawm an nih avangin inunauna ṭha siam tur a hmalakna hrang hrang kalpui dan te tarlangin Mizoram luhkapui pawimawh tak a nih piah lam ah Mizoram chhung leh pawn inkalpawhna changtlung zawk a awm theih nan Rel kawng leh 4-lane kawng laih leh peihfel thuai beisei a nih thu te a tarlang bawk a ni.
Kolasib District Silver Jubilee lawmnaah hian Kolasib District Village Council Association leh All NGO Coordination aiawh atangtein thusawi ngaihthlak a ni a, Silver Jubilee pual a Lungphum hawnna leh T-shirt tlangzarhna neih nghal a ni bawk.
Attachment
- Loading attachment...
