Inrinni kalta June 23 zing dar 10 atanga Kolasib khaw chhung power chawmtu Kolasib Project venga 3 MVA 33/11 KV Sub Station Power Transformer a chhiat avangin vawiin thleng khan Kolasib khaw pum chuan eng a nghei a, khawsak phung a khaihlak hneh hle.

Er. Lalduhawma, EE, P&E, Kolasib leh a hote chuan Power transformer chhia siam that hna hi chhun leh zan zawmin an thawk a. Silchar atanga khawl siamthatna tur part Pathianni kalta-a an lak chu khua hnawn lai nen a innan avanga awmzia a neihloh avang leh a khawl hrim hrim hi a hlui tawh avangin thawm that mai theih a ni lova. Nizan zanlai khan Vairengte leh Bairabi atangin Oil thar engemaw zat la lehin siam that hna hi chawl lovin an thawk mek reng a ni.

Tuna Kolasib chawmtu transformer hian khaw pumpui bak chhim lamah Sethawn thleng a chawm a. He khawl hi kum 1983 a bun tawh a niin a hlui tawh hrim hrim avang leh a chawm chin a zauh zel bawk si avangin a chawm zo tawh lova. Khawl thar bun vat a nih loh chuan chhiatna nasa zawk ala thleng thei a ni. Power & Electricity Department Kolasib chuan khawl thar mamawhna hi sawrkarah an lo thlen tawh a ni.