1458/2022-2023

Kolasib dated 4th August 2022: Vawiin chawhma khan I&PR Conference Hall, Kolasibah Kolasib leh Serlui Assembly Constituency-a Booth Level Officer 63-te tan Inthlanna kaihhnawih a Election Commission of India-in kalphung thar a siam te inzirtirna hun buatsaih a ni a. Pu John LT Sanga, District Election Officer chuan Training hawnna hun hi a hmanpui a ni.

Pu John LT Sanga chuan India ram chu khawvela inthlang ram lian ber a nih thu leh hnam, tawng leh sakhaw chi hrang hrang chen hona ram a nih avangin inthlan kalpui hna chu hna hautak leh uluk ngai em em a nih thu a sawi a. Inthlan hna langtlang leh thianghlim tak a kalpui a nih theih nana ECI-in thil thar a duan te zirchiang a, tangkai tak a hman a nih theih nan inthlanna felfai kalpuina kawngah BLO-te chu thawktu pawimawh tak an nih thu a sawi. Electoral Photo ID chu India khua leh tui nihna nemnghettu lehkha pawimawh tak a nih avangin a hun tak a pekchhuah a nih theih nan BLO-ten mawhphurna pawimawh tak an neih thu a sawi a. Vote thlak thei tur a kum tling thar a hun tak a E-Roll a ziahluhte, pianphung a rualbanlote vote thlak ve theihna tur a hmalak leh kum lam a upaten an duhthlanna chanvo tha tak a an hman chu ECI-in a ngaih pawimawh thu a sawi bawk a ni. Mipui aiawh tura ram hruaitu thlan chhuah nana duhthlanna chanvo kan neih chu hlut nachang hre turin leh midangten Vote thlak pawimawhna an hriat theih nana kawng kawhhmuhtu nih tum theuh turin BLO-te chu a chah bawk a ni.

Hun kaihruaitu Pu Gaston Vanlalhriatpuia, Election Officer chuan BLO kalkhawmte lawmna thu sawiin Inthlanna kalphunga an mawhphurhna hrang hrang a sawi a. ECI-in dilna Form thar a siam te, E-Roll-a inziaklut turin January, April, July leh October thla a ennawnna kalpui dan tur leh online-a GARUDA Apps hman dan zirtir nan vawiin hun chu buatsaih a nih thu a sawi a. Pu Timothy R.Lalhmangaiha, BDO, Bilkhawthlir chuan zirtirna a pe a ni. Tuirial Assembly Constituency chhunga BLO-te tan Ni 5, August 2022 hian SDO(C) Conference Hall, Kawnpuiah Training hi neih tur a ni dawn a ni.