1459/2022-2023

Aizawl 4th August 2022: Vawiin 4th August, 2022  khan Mizoram Taxation Department chuan Aizawl West Zone leh East Zone huam chhunga GST registration nei sumdawngte ko khawmin Taxation Department Auditorium-ah GST chungchanga hriat tur pawimawhte an zirtir a.

Taxation Department hotute chuan sumdawngte chu rinawm taka chhiah pe tur leh GST chu computer hmang veka thawh a nih tawh avangin an User ID leh password te,  an Email ID leh phone number hmante midang hnena pe lo turin an hriattir a. Chhiah pe tha duh lo te, pek tur aia tlem pe thinte chu dan anga khauh zawka enkawl a, a tul ang zela an thil neih leh bungruate che thei lo tura hrensak (freeze) thlenga hmalak an tum thu sumdawngte hi an hrilh a ni.
 
Vawiina sumdawngte zirtirna hun hi Pu David Lalchhuanawma Joint Commissioner of State Tax in a kaihruai a. Pu Kailiana Ralte Commissioner of State Tax in thu tawi sawiin Pu Daniel Lalmuankima, Asst. Commissioner chuan sumdawngte chu GST chungchang a zirtir a. Zawhna leh chhanna hun hman a ni bawk.

Vawiin GST zirtirna hunah hian sumdawngte an kal țha hle a. Naktuk August 5 hian Aizawl North Zone leh South Zone huam chhunga sumdawngte hnenah zirtirna pek chhunzawm a ni ang.