4186/2023-2024 

Dated Kolasib, the 15th March, 2024: World Consumer Rights Day pualin ‘Fair and Responsible Artificial Intelligence(AI) for Consumers' tih thupui hmangin Kolasib District Consumers Union (KODCU) chuan District Institute of Education & Training (DIET), Saidan Kolasib ah hun an buatsaih a. Kolasib District Bawrhsap, Chairman, Kolasib District Consumer Protection Council ni bawk Pu John LT Sanga chu khuallian niin Pu R. Vanlalena, Judge, Fast Track Court, Kolasib, President, District Consumer Dispute Redressal Commission, Kolasib ni bawk chu khual zahawm a ni.

Kolasib Bawrhsap Pu John LT Sanga chuan Consumer kan nihna ang leh India khua leh tui kan nihna ang pawhin kan mawhphurhna leh kan dikna chanvo hriatchian chu kan tih tur a nih thu sawiin heng chanvo kan hriatna hian huaisenna min pek bak ah dik lo tak a thil titute hrem an nih phah theih tur thu a sawi. Khuallian chuan 'Consumers te hian kan thil lei hi kan sum sen hu a ni ngei em tihte, a dik ngei em tihte, kan lung a awi em tih te hi kan hriat a ngaih thu sawiin Consumers Rights Act hian thil leitu zawng zawngte hi min hulhalh vek thu a sawi a, lungawi lohna neite chu Consumer Court pan nachang hre turin a chah bawk a ni.

Consumer Rights Day pian chhuah dan Pu John LT Sanga chuan tarlangin kumin thupui Artificial Intelligence chu kan nitin nun a hmun pawimawh luah chho mek zel thil a nih angin hmansualna lak a kan him theih nan zirchian leh a hman dan dik kan thiam a pawimawh thu a sawi bawk a ni.

Khual zahawm Pu R. Vanlalena, Judge, Fast Track Court pawhin thu sawiin, Consumers te lak a bumna thleng thei hrang hrangte tarlangin bum a kan awm loh nan consumer-te min humhalhtu dan hrang hrang hriatchian a pawimawh thu a sawi a. Harsatna tawk an awm a nih chuan dan ang tak a hma lak a nih theih nan thuneitute hnen a thlen nachang hriat a pawimawh thu a sawi bawk a ni.

Dr C. Lalmuankima, President KODCU kaihhruaina hnuai a hun hmanna ah hian Pu Lalhmingliana General Secretary, KODCU chuan KODCU din chhoh dan leh World Consumer Rights Day an hman chhoh dan report tawi a pe a. Resource Person Pu C. Vanlalruata, Assistant General Secretary, KODCU chuan Consumer Protection Act 2019, Legal Metrology Act 2009 leh World Consumer Rights Day 2024 theme hmangin kalkhawmte zirtirna a pe a. Pu Lalbiakthanga, Vice President, KODCU chuan lawmthu sawina hun a hmang a. Khawtlang leh tlawmngai pawl hruaitute leh DIET zirlaite he hun ah hian an tel a ni.