2580/2024-2025

Kolasib Dated the 17th October 2024 : November ni 5, 2024 a neih tur General Election to Sinlung Hills Council 2024 inbuatsaihna kal zelah vawiin khan Kolasib DC Conference Hall-ah District Election Officer hovin Meeting neih a ni.

General Election to Sinlung Hills Council hi kum 2019 khan a vawikhatna atan neih a lo ni tawha, November ni 21, 2024 hian a Term khatna chu a lo tawp dawn ta a. Hei vang hian Sub-rule (1) of Rule 3 of the Mizoram (Election to Sinlung Hills Council) Rules, 2019 in thuneihna a pek angin State Election Commission, Mizoram chuan a tum hnihna atan Sinlung Hills Council thar siam turin Inthlanna a buatsaih mek a. He inbuatsaihna kalzelah hian vawiin khan Kolasib District chhunga Sinlung Hills Council Inthlanna felfai leh boruak muanawm taka a awm theih nan District Election Officer Pu Robert C. Lalhmangaiha kaihruaina in Meeting neih a ni.

Meeting-ah hian Election Officials hrang hrang bakah Political Party Candidate-te leh Agent-te kim takin an kal thei a. Sinlung Hills Council Inthlanna lo awm tura State Commission-in inkaihhruaina (Model Code of Counduct) a siamte thlir hona neih a ni a. Political Party-te’n an in buatsaihna atan sum a hman theih bithliah cheng nuai hnih(2) hman dan tur a inkaihhruaina awmte thlirhona neih a ni bawk.

Pu Robert C. Lalhmangaiha, District Election Officer chuan General Election to Sinlung Hills Council neih turah hian Inthlanna felfai leh muanawma a awm theihnan kalkhawmte chu Mizo nunze mawi leh Kristian nun dan tha vawng reng turin a chah a. Political Party aiawha he huna kal khawmte chu Mizoram People’s Forum (MPF)te, leh NGO hrang hrangte thu ngaichang zela Campaign kalpui turin a chah nghal bawk.

Election Officer Pu H. Lalramliana pawhin Meeting-ah hian thusawiin, Mipuite’n zalen taka hruaitu an thlanna Democracy ramah, mipuite’n rilru thianghlim leh ngaihtuahna fim an phut theihna atan mitinin mawh an phur thu a sawia. Inthlanna dik leh felfai a awm theih nan Model Code of Conduct-te hrechianga, zawm tur leh tih loh turte zirchiang turin a chah a. State Election Commission in Candidate te'n Election inbuatsaihna atan pawisa an hman theih bithliahna a siam chu Candidate-te'n inkhairual taka inbuatsaihna an kalpui theihnana tih a ni tih hrereng turin a chah nghal bawk.

Meeting-ah hian Pi B. Malsawmtluangi, Addl. DC., Election Returning Officer Pu H. Vanlalbiakzauva, SDO Civil Vairengte leh Pu Samual Lalmalsawma Sailo, BDO Bilkhawthlir, bakah Pi Nancy L. Pakhuangte, Expenditure Monitoring Officer-te an tel bawk a ni.