446/2023-2024

Kolasib dated 13th May 2023: Vawiin chawhnu khan Diakkawn Square, Kolasibah Mizo Zaimi Inzawmkhawm (MZI), 05 Riders leh Mizo Zirlai Pawl, District Headquarters, Kolasib te țangkawp buaisaihin 'Charity Concert' neih a ni a. Pu John LT Sanga, Deputy Commissioner chu khuallian niin Pu Thomas D.Lalengliana, President, Sub-Headquarters YMA Kolasib chu khual zahawm a ni bawk.

Deputy Commissioner Pu John LT Sanga chuan kan state thenawm a buaina thleng avangin Kolasib district-ah kan unau zohnahthlak raltlan țhahnem tak an awm thu sawiin hun harsa leh buaina kar a unaute pui theitu nih chu thil hlu tak a nih bak a țanpuina dawngtu tan pawh a lawmawm dan a thuk bik thu a sawi. Mizo zaimi inzawmkhawm, 05 Riders leh MZP hmalakna a mi inphalte tan a țanpui ngaite țanpuina hun remchang buatsaih a ni chu lawmawm a tih thu Pu John LT Sanga chuan sawiin an thiamna leh theihna ui hauh lova raltlante tan Kolasib MZI an lo penchhuak chu entawntlak a tih thu a sawi bawk a ni.

Khual zahawm Pu Thomas D.Lalengliana, President, Sub-Headquarters YMA chuan zohnahthlak zingah țawng, thuam inbel leh ziarang ah inan lohna deuh nei țhin mah ila, kan inanna tam zawk avanga induhsak leh ințanpui tawn tur kan nih thu sawiin hun harsa kar a ințanpuina chuan inunauna leh inpumkhatna țha a hrin chhuah ngei a beisei thu a sawi.

Raltlan te pual a Charity Concert buatsaih ah hian Kolasib khaw chhung a MZI member zaithiam țhahnem tak an zai a, 05 Riders leh MZP ten an țawiawm bawk a ni.