4170/2024-2025

Dated Kolasib the 10th February, 2025: Vawiin khan Kolasib DC Conference Hall ah Kumin VC Inthlanpui, February ni 12,2025 a lo thleng tur atana District Election Office leh Security lam inpuahchahna te thuthar lakhawmtute leh NGO pawl hrang hrang leh Party aiawhte hnenah tarlanna hun hman a ni a. He hun hi Pu Robert C Lalhmangaiha, District Election Officer Kolasib leh DC Kolasib ni bawk chuan a kaihruai a, Pu David H Lalthangliana, Sr SP Kolasib, Pu H Lalramliana, Election Officer, MPF, YMA, Party aiawhte te leh MJA member te an tel a ni.

He hunah hian DC chuan Election inpuahchahna an hmawrbawk dawn hnai ta a, tun china buaina leh harsatna lian tham awm lo a thil a kal tluan zel avangin District Election Office, Police lam te leh NGO aiawhte hnenah lawmthu a sawi a. February ni 12 a inthlanna  pawh ralmuang leh felfai taka a kal theih nan kalkhawmte chu thawk tlang a, an tha te sangmar leh turin a sawm a ni. He hunah hian DC hian VC Inthlanpui 2025 leh Kolasib inbuatsaihna tih Lehkhabu chu a tlangzarh nghal a, he lehkhabu buatsaihtute, a bik takin Pu H Lalramliana, Election Officer hnenah lawmthu a sawi nghal bawk a ni. 

Pu H Lalramliana, Election Officer chuan Election a an inpuahchahna hrang hrang sawi langin, Kolasib District bikah hian VC 60 awmin Seat 288 chu mi 944 in an inchuh dâwn a ni, a ti. Polling booth hi 81 a awm a, Polling Station tinah hian polling party pakhat zel - Presiding officer, Polling officer leh returning officer te an awm dawn a, anmahni bakah hian District pum atan Sector officer 11 ruat an ni, a ti a. Inthlanni February ni 12 zing dar 7 ah vote thlak tan theih a ni anga, tlai dar 4 ah khar a ni ang. Polling party te veivahna dal lo turin Kolasib District hmun hrang hranga kawng siama thawktute pawh biak anni tawh a ti a, Vote te hi Vote thlak ni, zan Dar 7 ah chhiar a ni nghal dawn bawk a ni. 

Pu David H Lalthangliana, Sr SP Kolasib pawhin venhimna lama an inpuahchahna te tarlangin, kumin January ah security review a rel angin critical  polling station a awm dawn lo a ni, a ti a. Polling station tinah Police pakhat zel an duty anga, kuminah hian Vulnerable PS a puan awm lo mahse, MP leh MLA Election a an lo puan tawhna hmunah te  constable pakhat leh  Havildar pakhat an duty dawn a ni, a ti. Hemi piahlam ah hian Armed Police te NAKA Check gate ah an duty tur thu a tarlang bawk a ni. 

SP hian Sector Police Officer te, Quick Reaction Team te, Reserve party leh Polling station duty tur team te an in peihfel vek tawh thu a sawi a. Election atan hian patrolling pawh  January kar tawp atanga neih tan ni tawhin, zu leh a kaihhnawih  engemawzat an man tawh a ni, a ti . Kolasib District ramri, Cachar leh Hailakandi lam te nen pawh venhimna tha taka a kal theih nan an in biak pawh thin thu a sawi bawk.