No.5421/2020-2021

Kolasib 25th September 2020: Vawiin chawhma khan Krishi Vigyan Kendra, Kolasib district hnuaia ar vulhtute dawmkanna leh arsa leh artui a intodelhna tur atan a duan, ‘Improving Livelihood and Nutritional Security through Backyard Poultry Production’ Project hawnna hun hman a ni a, Dr H Lalthlangliana, Deputy Commissioner, Kolasib district chu khuallian niin department hrang hranga hotute an tel bawk a ni.

Dr H Lalthlangliana chuan Kolasib district chhunga kuthnathawktute hmasawnna tur ngaihtuahtu department hrang hrang leh thawktu inpezo tak tak an awm chu Kolasib district-a kuthnathawktute tan malsawnna nasa tak a nih thu sawiin ar vulhtute hmasawnna tur atan a siam ‘Improving Livelihood and Nutritional Security through Backyard Poultry Production’ pawh hlawhtling taka kalpui a nih theih nan duhsakna a hlan. “Hlawhtling tur chuan taimakna leh remhriatna kalkawp tir a pawimawh hle a, remhre tur chuan kan mithiamte kan rawn peih a, kan chhawr thiam a ngai a ni,” a ti a,” Teirei peihna hian hlawhtlin leh hawltlin loh tur thui tak a hril bawk a ni,” tiin hmasawn duhna thinlung pu chungin tihtak takna nen ar vulh hna chu kalpui turin he project hnuaia mi thlanchhuahte chu a chah a ni.

He hun hi Dr Michelle C Lallawmkimi, Senior Scientist & Head, KVK, Kolasibin a kaihruaia, Dr David Malsawmdawngliana’n project kalphung tlangpui sawi zauna hun hmangin Dr Carolyn Zothansiami’n lawmthu sawina hun a hmang bawk a ni.

‘Improving Livelihood and Nutritional Security through Backyard Poultry Production’ Project hi Kolasib district chhunga ar vulhtute dinhmun chawikan a nih theih nana eizawnna ngelnghet siam nan leh arsa, artui leh ar note a mipuite kan intodelh theihna tur atan duan a ni a. Project kalpuina sum hi ICAR-Vivekananda Parvatiya Krishi Anusandhan Sansthan, Almora, Uttarakhand atangin cheng nuai 6 hmuh a ni. He project kalpui tur hian Zone 7 hnuaia KVK 43 zingah 5 thlan a ni a, Mizoram chhunga kalpui turin KVK, Kolasib district hi thlanchhuah an ni. Kolasib, Lungmuat, Thingdawl, Kawnpui leh Buhchangphai atangin ar vulh hlawhtling theih tur a ngai mi 10 theuh thlanchhuah an ni a. Anni hnenah hian ar note 50, ar note chaw kar 3 daih bakah khaw pakhat tan a inhmantawm tur artui tihkeuna khawl leh inverter pek tel an ni bawk a ni. Heng ar note te hi KVK a thawktuten thla tin an vilpui reng dawn a, a tul angin vaccine leh damdawite pawh an pe dawn bawk a ni. Ar sem chhuah te hi Rainbow Rooster an ni a, “Rainbow Rooster vulh leh enkawl dan” thuziak buatsaih pawh vawiin hian khuallian hian a tlangzarh nghal a, ar vulh kawnga inzirtirna neih nghal a ni bawk.