Vawiin khan Parliamentary Secretary for Home Pu Lalrinmawia Ralte hovin a Chamber-ah Department hotu hrang hrangte nen kumin 2011-2012 Krismas leh Kumthar vuakveta halpuah, halmawi, halzit etc. khapna kenkawh chungchang an sawiho a. Nikum leh kum hmasa lama sawrkarin hlawhtling taka a lo khap tawh angin kuminah pawh hian khap leh nise tiin lungrual takin an rel.
He Committee hian Mizoram mipui zawng zawngte hnenah Krismas leh Kumthar vuakveta heng sawrkar ina a khap halpuah, halmawi leh halzit etc. te hi hralha lei lo turin a ngen a. Dawrkai leh sumdawngte pawh uluk takin thupek kengkawhtuten an thlithlai reng dawn a, man an nih chuan Dan anga nataka hrem an ni ang.
Krismas leh Kumthar vuakvet hun remchangah Aizawl leh District khawpui zawng zawngah thalaite intihhlimna YMA te nen tanghova Kumthar zanah siamtum a ni a. Aizawl khawpui chhungah hmun 5 ah siam a ni anga, Lunglei-ah hmun 2 ah siam a ni bawk anga, District Headquarters dang zawngah hmun 1 theuhah siam tum a ni. Aizawl tih loh District Headquarters hmun dang ah chuan DC leh Tlawmngai pawlte nena tanghova hun hman dan tur ruahman a ni ang.
He Committee-ah hian Pu Lalrinmawia Ralte chuan Department tina mawhphurtute tanrualna leh thawhhona zarah kuminah pawh boruak muanawm tak hnuaiah Krismas leh Kumthar hlimawm tak kan hman theih ngei a beisei thu sawiin Mizoram mipui zawng zawngte he ruahmanna hi lo tawiawm theuh turin a sawm a ni.
