3388/2022-2023

Aizawl 27th January 2023: Vawiin khan KTP inkhawmpui lian thlengtu tur, Ngopa khawtlang inbuatsaihna hrang hrang te Mizoram sorkar, HRD Board vice chairman leh bialtu MLA ni bawk Dr. L. Thangmawia hovin Organising Committee hruaitu, sorkar department hrang hrang hotute leh Ngopa Village council leh NGO hrang hrang hruaituten Ngopa Presbyterian Kohhran Hall-ah an thlir ho.

Presbyterian kohhran, Ngopa pastor bial vawngtu, Rev. E. Ramchullova kaihhruai he hunah hian Dr. L. Thangmawia, MLA chuan kum 2024 inkhawmpui lian tluang taka Ngopa in a thlen theih nan ngaihtuahna seng a, a theih chin china tang ho zel turin kalkhawmte a sawm a. Sorkar department hrang hranga officer kalkhawmte pawh an hnathawh pangngai tibahlah si lova Ngopa khaw tana insawrbing tur te, mihring lam inpuahchah piah lamah Pathian tanpuina nen inkhawmpui hlawhtling tak Ngopa in a thlen theih ngei a rin thu te sawiin, inhmuhkhawmnaa tel sorkar official te chu an thiamna leh theihna te he khawmpui hlawhtlin nana hmang a, organising committee ten mamawh an hnena an thlen a theih chin china ngaihtuahpui zel turin a ngen a ni.

He hunah hian Organising Committee Secretary, Pu C.Lalrosangan KTP inkhawmpuilian 2024 an thlen tur atana pawimawh leh tul hrang hrang te Lengteng bialtu MLA leh sorkar department aiawhtute hnenah hian a thlen a. Sorkar department aiawhtu officer hrang hrang ten khawmpuilian atana an department inbuatsaih tawh dan te leh an hmachhawp hrang hrang report an pe a, inkhawmpui hlawhting tak neih a nih theih nan theihtawp an chhuah tur thu an sawi hlawm a ni.

Inkawmkhawmna neih a nih zawh hian inkhawmpui lian pandal sakna tur hmun, Ngopa public playground tlawhin, ruahmanna awm mek leh tihhmabak hrang hrang te an thlir ho bawk a ni.

Vawiina inkawmkhawmna hunah hian Organising committee leh Ngopa khawtlang NGO hrang hrang bakah Mizoram sorkar hnuaia department hrang hrang atangin - Addl.DC, Saitual, SP Saitual, CMO Saitual, DFO Champhai, EE PWD Khawzawl, EE PHE Khawzawl, EE P&E Khawzawl, DHO Saitual, DUDO Saitual, DEO Saitual leh NHIDCL hotute an tel a, Ngopa a sorkar hnathawk hrang hrang te pawhin Ngopa SDO Civil hovin an telpui bawk a ni.