Vawiin ah khan Aijal Club Conference Hall ah National Bank for Agriculture and Rural Development chuan Mizoram chhunga Bank hrang hrang te an zirchianna atanga chhutchhuah, Bank ten Loan pekchhuah theih tur zat puanchhuah nan State Credit seminar for Mizoram, 2016 an buatsaih a. He hunah hian NABARD chuan state hmasawnna atana loan hman tulna hrang hrang zirchianna leh inkaihhruaina bu a siam, State Focus Paper chu Mizoram Governor Lt Gen Nirbhay Sharma (Retd.) chuan a tlang zarh a ni. NABARD chuan kum 2016-17 chhung hian Mizoram Bank hrang hrang atanga loan pekchhuah theih tur zat chu Rs. 959 Crore ni in a tarlang.

Seminar hawngtu, Mizoram Governor Lt Gen Nirbhay Sharma (Retd.) chuan Mizoram chu thlai chitin reng thar theihna hmun, ruahtui tamna ram a nih piah lamah Mizo mipui ten chaw atan an rin ber buh thlenga kham khawp thar theihna hmun a ni a ti a. Agriculture leh Horticulture hmanga state intodelh ah Mizoram siam a nih theih nan Irrigation, Power leh Technology a pawimawh hmasak thu a tarlang. Thla 8 chhung lai Mizoram in ruahtui tam tham tak a dawn chu tun thlenga dahkhawl na tha tawk siam a nih loh vangin thal leh thlasik thlai tam tam thak thar a ni thin lo a ni a ti. Khawl leh mithiamte puihna hmanga tuna loneih dan Mizo loneitu ten an kalpui mek chu her danglam chuang lova Organic farming changtlung a chhuah chu Agriculture and Allied sector a Mizoram tana pawimawh a nih thu a tarlang a. Mizoram chuan kawlphetha a siamchhuah theih zat atanga 1% aia tlem mah siam chhuak in tan kan lak a ngai hle a ni a ti. Sector dang ang bawkin Agriculture Sector hmasawnna atana pawimawh leh inghahna chu kawngpui leh inkalpawhna tha zawk a nih thu tarlangin British hunlai ah pawh an lo hman tawh luipui dung te pawh bungraw thiar nan hman that leh a tangkai tur thu a sawi a. Hmun kil tin te kawngpui in a pawh theih loh avangin puakphur thei ran te pawh chhawr tangkai a tul thu a tarlang bawk. Ramngaw leh nungcha humhalhna mil tak siin Mizoram in NLUP a kalpu a ni i chu lawmawm a tih thu sawiin beneficiary chhungkaw nuai khat chuang awmna Flagship Programme chu NABARD chuan ngaihven bik se a duhthu a tarlang a. NLUP beneficiary ten sawrkar atanga tanpuina an dawn atawp hun in sum an mamawhna a tawp mai loh tur thu sawiin chumi hunah chuan Bank te leh NABARD pawh beneficiary zinga tanpui mamawh te tan an lo inhawn a pawimawh dawn a ni a ti.

State Credit Seminar a thusawitu dang, Finance Minister Pu Lalsawta chuan Mizo ten sawrkar an neih tan tir chuan sawrkar chu ramchhung inrelbawlna chiah kengkawhtu ah an ngai mai a. Hun lo kal zelin sawrkar chuan huang zauh in loneih kawngah pawh zirtirtu niin demonstration farm ah hralh tur ni lo thlai huan te pawh a lo nei chho zelin tun dinhmun a sawrkar mawhphurhna lo ni ta te a tarlang a. Tunah chuan Mizoram state pawh subsistence economy enkawltu mai a ni tawh lova market economy kalpuitu nih tum in theih tawp a chhuah mek a ni a ti. Agriculture tih hmasawn nan Sawrkar in hma a hruai anga, he hmalakna ti chak tur erawh chuan Bank hrang hrang te bakah mihausa te thil phal te leh inhawnna a pawimawh tak zet thung a ti a . Bank in loan an pek chhuah that ngam loh chungchangah loan latu ten mawh an phurh thu tarlang in a mamawhtu te tan loan a awm zel theih nan mipui kan rinawm a tul hmasa a ni a ti.

Seminar ah hian Bank hotute leh University zirlai te telin sawiho na hun buatsaih a ni a. Pu D.K. Mishra, GM, NABARD, Mizoram RO, Pu. S.Sankaranarayanan, Deputy GM, NABARD, Pu Lalrokunga Chhakchhuak, Manager, NABARD, Lunglei bakah Pu Amitava Datta, AGM & Convener, State Level Bankers’ Committee ten sawi zauna hun an hmang a ni.

NABARD in Bank Loan pekchhuah theih zat an chhut atanga 48% hi crop loan ah ruahman a ni in 35% MSME ah ruahman a ni a. Nikum nen khaikhin a Loan pekchhuah theih zat punna hi 28% a ni. NABARD hotute chuan kum in chhung khan project hrang hrang kalpui na atan Rs.121 crore a pe chhuak tawh a, Agriculture refinance nan Mizoram Rural Bank hnenah Rs.22 crore leh Mizoram Cooperative Apex Bank hnenah Rs.20 crore a pe chhuak tawh bawk a. Aizawl, Champhai leh Mamit Distrcit chhunga Farm puih nan KVK hnenah Rs.30 Lakhs pe in District hrang hrang a Farmers’ Producers Organisations 15 hnenah Rs.136 Lakhs a pe chhuak tawh a ni.