Vawiin khan Food, Civil Supplies & Consumer Affairs Minister Pu John Rotluangliana chuan National Food Security Act, 2013 (NFSA-2013) chu March ni 1, 2016 atangin Mizoramah hman tan a ni dawn tih Vanapa Hall-ah a puang a. Hemi pual inkhawmhi Art & Culture Minister Pu Romawia leh Education Minister Pu H. Rohluna bakah Parliamentary Secretary leh MLA thenkhatten an hman pui a ni.

Khuallian FCS & CA Minister Pu John Rotluangliana chuan thu sawiin Mizoram mipui nuai sarih chuang nghawng tur, Food Security Act, 2013 chu March ni 1, 2016 atangin Mizoramah hman tan a ni dawn tih puang a. Mizoramin NFSA-2013 a hman nghal mai theihloh nachhan sawiin Minister chuan, “Mi zawng zawngin ration card kan neih thin chu NFSA-2013 hnuaiah chuam mi 7,06,296 chauhin ration card an neih theih tawh dawn avangin a dawn thei tur chinfel leh buaipui tur a tam avang leh sawrkarin mipuite tana tha ber tur a ngaihpawimawh tel vang a ni,” a ti a. NFSA-2013 hnuaiah mipuiten harsatna an tawh loh nan sawrkar laipuiin hamthatna a pek bakah Mizoram sawrkar chuan Priority Household (PH) hnuai amite tan buhfai Kg 3 bakah NFSA-2013 in a huamloh, Non NFSA Household-te tan buhfai Kg. 8 chu Chief Minister hovin ruahman belh a ni tih khuallian chuan a sawi a. Minister chuan Mizoramin statistics mumal tak a neilo chu pawi a tih thu sawiin, nasa takin hmalakna a tithuanawp thei a ni, a ti bawk. NFSA-2013 hmang tur hian uluk takin ruahmanna kalpui ni mahse mihring pung zel avangte leh thil dang dangte avangin fel thlip thlep a ni thei dawn rih lova, a tul angin siamrem chhoh zel a ni ang a ti bawk. Mizoram hmun hrang hranga buhfai kudam ruak anga sawi awm thin sawifiahin Minister chuan, “Tunhma angin buhfai chhek khawl vak vak a awm tawh lova, mahmawh mil (need-based) zela pek chhuah a thin a ni,” a ti a. Mega Block avanga buhfai harsatna awm tura ngaih pawh sawrkarin ruahmanna tha tak a neih lawk avangin harsatna lutuk a thlen rihlo niin Minister chuan a sawi bawk.

Khualzahawm, Parliamentary Secretary, Pu TT Zothansanga pawhin thusawiin Mizorama NFSA-2013 hman tan a ni thei ta chu a lawmawm hle a ni, a ti a. Minister chuan “Mizorama leilet (WRC) siam theih zawng zawng hi leiletah siam nise chuan Mizoram hian khamkhawp buhfai a thar chhuak theih ngei ang tih Satellite hmanga zirchianna chuan a tarlang a ni,” a ti bawk. Parliamentary Secretary chuan Mizo mipuite chu taima lehzual a hnathawk a, buh leh bala intodelh turin a sawm a ni.

NFSA-2013 hian Mizoram mihring 7,06,296 a tuam dawn a. Chungzingah chuan thingtlanga cheng mihring 81.9% leh khawpuia cheng mihring 48.6% a huam tel dawn a ni. NFSA-2013 hnuaia hamthatna dawng turte hi hlawm hnih - AAY Household leh Priority Households-ah then niin, AAY Household hnuaia chhungkuate hian thlakhatah buhfai Kg 35, Kg 1-a Rs. 3 zelin an lei thei ang a; Priority Households hnuaia mite vethung chuan thlakhatah mi pakhat tan Kg 5, Kg 1-a Rs. 3 zelin an lei thei dawn a ni. Mizoram sawrkar chuan NFSA-2013 hnuaia Priority Household-te leh NFSA-2013 hnuaia hamthatna dawnglo tur chhungkuate (Non-NFSA Household) tan ruahmanna a siam bawk a. Priority Households hnuai amite hian NFSA-2013 hnuaia an hamthatna bakah mi pakhat tan buhfai Kg 3, Kg khat Rs. 15 hisapin an lei thei ang a, Non-NFSA Household-te erawh chuan mi pakhat tan thlakhatah Kg 8, Kg 1 cheng 15 hisapin an lei thei bawk ang.

Heng bakah hian nu, railai leh nau hnute pe laite chuan thlaruk chhung man neilovin buhfai an dawng thei dawn a, naupang thla ruk leh kum ruk inkar ten man nei lovin Aganwadi kaltlangin chaw an dawng thei bawk ang a, naupang kum 14 chin hnuailamin an school kalna theuhah nikhatah chaw, vawikhat man nei lovin an dawng thei bawk ang.

NFSA-2013 hamthatna dawngturten engemaw harsatna avanga an dawn tur ang buhfai an dawng theilo a nih chuan The Food Security Allowance Rules, 2015 in asawi angin an dawn tur zat buhfai man pawisafai a pek an ni bawk ang.

NFSA-2013 atan hian Ration Card thar, rawng chi thum siam a ni a, AAY Households tan rawng Eng, Priority Households tan rawng Hring leh Non-NFSA Household tan rawng Var hman a ni a. Ration Card-te hi ID (Alphanumeric 18 digit Unique Ration Card ID) pek vek an ni a. Ration Card tharte hi awmhmun chhinchhiahna atan leh official thil-ah hman phal a ni lovang. NFSA-2013 hman tan turah hian mihring 11,97,111 te tan Ration Card 2,44,511 siam a ni a. Thla khata Mizoramin NFSA-2013 hnuaia buhfai a mamawh zat tur chu AAY atan MT 902.48, PHH atan MT 4,494364 leh Non-NFSA atan MT 4,417.83 ni tura chhut a ni a. Hemi atan hian Mizoram sawrkarin buhfai lei nana a hmanral tur chu Rs. 13.70 Crore a ni ang a, NFSA-2013 hma a senso aiin Rs. 2.25 crore velin a hniam zawk tura beisei a ni bawk. NFSA-2013 hawnna inkhawm hi FCS&CA Secretary Pu Hrangtawna, IRTS chuan a kaihruai a.

NFSA-2013 Nodal Officer, Pu John Tanpuia, Deputy Director, chuan NFSA-2013 hmang tura hmalakna leh Mizorama NFSA-2013 hman dan tur chipchiar takin report a pe bawk. Inkhawm hi FCS&CA Director Pu HL Rochungnunga’n lawmthu sawiin a khar a ni.