1517/2022-2023
August 9th 2022: Tun thla ni hmasaber (01.08.2022) atang khan Directorate of Economics & Statistics chuan Birth Certificate leh Death Certificate a pek chhuah thin, Manual Certificate chu titawpin Digitized Certificate chauh a pe chhuak ta a. Digitized Certificate hi August 2022 hma lam zawng kha chuan a diltu hnenah chauh pek thin a ni.

Economics & Statistics Department hnuaia District Office zawng zawngah Digitized Certificate chauh pek chhuah theih tura ruahmanna siam mek a ni a. Veng leh Khua leh Hospital RBD-te erawh chuan hun engemaw chen chu Manual Birth Certificate leh Death Certificate an la pe chhuak rih ang.

Digitized Certificate hian Certificate lem lo siam ve thinte a dang chat tawh dawn a. Digitized Birth Certificate leh Digitized Death Certificate hi a hard copy-a ken reng ngai lovin, Certificate-a QR Code scan-in duh hun huna hman theih turin smart phone-ah a dahthat theih a ni.

Digitized Certificate siam man hi Manual Certificate siam man zat tho a nih avangin mipuite tan phurrit a awm dawn lo.