Vawiin khan Lai Autonomous District Council (LADC) hnuaia 5-Lungtian MDC Constituency leh Chakma Autonomous District Council (CADC) hnuaia 9-Ugudasury South MDC Constituency-a June ni 6, 2019-a by-election neih tura duty tur polling party-te chuan Lawngtlai DC office kawt atangin an duty-na tur polling station lam an pan.

Polling party kal chhuak turte hian DC Conference Hall-ah an bungraw mamawh turte la khawmin, EVM ken turte an enfiah a. Chumi hnuah an duty-na tur polling station theuh panin an kal chhuak hlawm a. Polling party kal chhuak turte hi he'ng bial pahniha Returning Officer Dr Andrew H. Vanlaldika MCS bakah, election official leh staff te'n an buaipui a ni.

Vawiina kal chhuakte hi Lungtian MDC biala polling station pali - Lungtian-I (150 km), Lungtian-II (151 km), Vartek (157 km) leh Vartekkai (161 km) tea duty tur polling party pali leh Ugudasury South MDC biala polling station pahnih - Ugudasury 'S' (158 km) leh Jarulsury (174 km) tea duty tur polling party pahnih an ni a. Polling party-ah hian presiding officer pakhat leh polling officer pahnih theuh leh security personnel te an tel a. He'ng bakah hian inthlan nia inbiak pawhna lam buaipui tur MPRO-te pawh an chhuak tel ve nghal bawk.

He by-election atana Model Code of Conduct (MCC) team dinte chu MCC bawhchhiatna a thlen leh thlen loh enfiahin an bialah an lo chhuak tawh a. Inthlan ni thlengin an vil zui dawn a ni.

He'ng MDC bial pahnihahte hian June ni 6, 2019 zing dar 7 atanga tlai dar 5 thleng vote thlak a ni dawn a. Vawiin, June ni 4 tlai dar 5 hian campaign theih hun a tawp dawn a. State Election Commission chuan hemi piah lama he'ng bial pahniha vote nei si lo political party hruaitu leh campaigner-te bial chhunga an awm a khap a, Returning Officer Dr Andrew H. Vanlaldika chuan chuti ang mi an awm chuan campaign hun tawp veleh bial chhung chhuahsan turin hriattirna a chhuah a ni.

Ruahman lawk dan chuan he'ng bial pahniha MDC by-election vote thlak nana hman EVM-te chu Lawngtlaiah phurh khawm niin, vote tlate chu June ni 8 (Inrinni) khian Lawngtlaia BNRGSK Hall-a a chhiarna tur ruahmanah chhiar a ni ang.

Attachment

  • Loading attachment...