Vawiin khan Khawzawl Damdawi Inah a thlawna inentirna leh thisen pek runpui neih a ni a. He hun hi P&E Minister Pu R.Lalzirliana chuan Khuallian niin a hmanpui a ni.

Pu R.Lalzirliana chuan Khawzawl leh a chhehvel khuate mamawhna hriaa Doctor thiam rual te hnena inentir theihna hun leh mamawh a piangte hman theih tura thisen pek runpui khaw tha tak hnuaia neih ani chu lawmawm a tih thu a sawi a. Bialtu MLA damlohna vanga phai lama inenkawl mek pawhin that lam a pan zel thu leh a bial mipuite tana rilru a seng nasat thu sawiin, dam taka  lo chhuak a bial tana hna thawk thei turin duhsakna a hlan a. Khawzawlin  hman atanga District  a lo nghah tawh a nei  tur chu a lawmpui thu leh  hemi tichiang turin nimin lam khan  GAD notification tihchhuah a ni, a ti a. Hun engemaw chhung atan Civil SDO Office chu DC Office anga  hman anih rih tur thu sawiin,  District tharahte kumin atangin Independence day lawmna hun DC thar kaihhruaina hnuaiah MLA ten hnam puanzar an pawhpharh hman ngei a beisei thu a sawi bawk. 

Khuallian chuan hriselna lam kawnga mipuite mamawhna hriaa an harsatna sutkian sak tura  hruaituten hetiang hun tha an buatsaih chu fakawm a tih thu a sawi a, mamawhtu tana thisen petute chhuanawm a tih thu leh an inpekna ropui a tih thu a sawi bawk.  Midang tana malsawmna ni tura thisen pek chu Zonun ze mawi tak leh chhawmnung zel tlak anih thu a sawi a. Sawrkar hmalakna vanga man chawi lova thisen dawn theih ani chu lawmawm a tih thu sawiin, hei hian Sawrkar hotuten Mizo mipui an hmangaih zia a tilang a ni, a ti a. Tunlai hmasawnna thang zelah Zofate ngei pawhin hmuh theihin hma kan sawn a,  raltiang ram  kai ve tanin  khua a var tan tawh a ni, a ti a. Mipui he hun hmang tura kalkhawmte chu midangte tana malsawmna nih  tum tur leh  tanpui ngaite tan mahni ral raih thleng pawh a inpe thei tura penchhuah theuh turin a sawm a. Free Clinic leh Blood Donation Camp hlawhtling leh zawngchhang tlak tak neih anih theihna turin duhsakna a hlan a ni.

Thusawitu dang Dr PC Lalramenga, Medicine Specialist, Team Leader chuan Khawzawla Free Clinic lian tham tak huaihawt ani chu Team tan pawha chona thar tha tak anih thu leh mamawhtute tana tangkai tak anih thu a sawi a. Thisen pe tura rawn penchhuak zawng zawngte inpekna a fak a, Medical Team, Hospital Staff leh khawtlang hruiatute thawhrimnaah lawmthu a sawi bawk a ni.

He hunah hian Dr Rothangpuia, Blood Donation Leader pawhin thusawiin, hnam changkang apiangin thisen pek an uar a, thisen pek kawnga Khawzawl leh a chhehvel khaw mipuite inpekna chu chhuanawm a tih thu leh changkang a tih thu a saawi a. Thisen pek tum zawng zawngte hnen atanga thisen lak chu duh viau mahse hun, hmanrua leh thawktu indaih tawk lohna vanga lak vek sen ani  lo chu thinlung taka pawi a tih thu a sawi  a ni.

Vawiin Free Clinic neih zawh takah hian Specialist Doctor 10 ten inentirna an hawng thei a. Inentir zawng zawng hi mi 1718 niin, Medicine 670, Paedetric 230, Gynaecology 220, Dental 197, ENT 178, Surgery 43 leh Chest Medicine 21 te an ni a. A thlawna thisen pek zawng zawng hi Unit 159 niin, Mipa123 leh Hmeichhia 36 ten an pe a, heng bakah hian thisen pek tum hmanrua, hun leh thawktu indaih lohna vanga pe thei talo za chuang an awm bawk a ni.

Vawiin Free Clinic leh Blood Donation puala hun hman hi Pu Lalsanglura Hnamte, President, Khawzawl Joint YMA chuan a kaihruai a. Pu H.Zoremsanga, Chairman, Khawzawl Joint VC-in kalkhawmte lawmna thu a sawi a. Inhmelhriattirna hun neih anih hnuah Pu Jahau JH Thangpuia'n programme buatsaih anih chhan   a sawi a. Pu H.Lalhmachhuana'n lawmthu sawina neiin hun a khar a ni.

Free Clinic cum Blood Donation Camp hi Khawzawl Joint YMA, Joint VC leh Tuichang North Block MNF Thalaite tangkawp buatsaih a ni.