Mizoram Engineering Service Association (MESA) vawi 33-na chu vawiin nileng khan Art & Culture Auditorium, Beraw ah neih a ni a, Parliamentary Secretary Pu Lal Thanzara’n a hmanpui.
    
Khuallian Pu Lal Thanzara chuan Engineer te chu ram hmasawnna ruhrel khawihtu an ni tiin mipui leh ram hmasawnna tura an hma zawn theuhva thahnemngai taka an thawhna ah lawmthu a hrilh a. Engineering department hrang hrang hmalakna tlangpui sawiin Pu Lal Thanzara chuan kawlphetha siamchhuah lamah Tuivai 210 MW pe chhuak thei tur, State Project ni tur, State sum seng lova, India rama a vawi khatna atan Viability Gap Funding, Public Private Partnership-a project siam tum chu bul tan thuai a nih theih nan project ngaihtuahtu department hrang hrang te chu New Delhi ah an thutkhawm thuai dawn thu a sawifiah a. Hun rei tak sorkar hnathawk mi thar lak khap pawh sorkar chuan thlah dulin Minor Irrigation Department ah post thar 65 siam a nih thu te, Power & Electricity Department ah AE/SDO 13 lak thar phalsak an nih thu leh PWD hnuaiah pawh Chief Architect post siam thara Senior Architect 2, Architect 4 leh Asst. Architect 10 post an awm tak thu te leh AE 24 lak thar an nih thu te a tarlang bawk. Minor Irrigation Department hmalaknain Sorkar chuan Project 193, ram hectare 9044 ah tui pekna tur thawk zovin kumin chhung hian Project 71, ram hectare 3830 tui pekna tur rawtna pawh Sorkar laipuiah thehluh a nih thu leh sanction nghah mek a nih thu te a sawi lang bawk.
    
Kawngpui siamthat phuta sorkar nawr nana khawtlang mipui ten hma an la thin chu sawifiahin Parliamentary Secretary chuan kawngpui cheithat tumna sumhnar atanga sum la hmuh a nih loh avanga sorkarin harsatna a tawh thu a tarlang a, ngaihthah vang a nih loh thu a sawifiah. Champhai-Khawbung-Biate kawng chu ADB atanga loan laka siam tum a ni a, sanction la chhuah loh avanga hmalak a la ni lo a ni, a ti. Khawzawl-E.Lungdar kawng siamna tur Rs 200 crores pawh Sorkar laipuiin min pek theih tak loh avanga khawih rih loh a nih thu a sawifiah bawk. Heti chung hian Sorkar chuan sum neih ang  angin kawng chhe zual lai te cheithat hna chu thawh chhoh mek a nih thu sawiin 13th Finance Commission sum neih atangin Champhai-Khawbung-Biate kawng leh Mualkawi-Tiau kawng te pawh chei mek a nih thu a sawifiah bawk. Khawthlang lamah pawh Kanhmun leh Medeli inkar supply kawng chhia siam tura hnatlang pawh PWD chuan JCB leh Boulder te thawhin thawhho an tum thu te sawiin he kawng siamthat nana sum neih tawh a nih thu leh Tender buatsaih mek a nih avanga tuna sum tam tak senga hma lo lak a rem loh dan te a sawifiah bawk.
    
Ram hmasawn nan leh mipui tana tangkai tur Contractor ten an thawhna ah harsatna siamsaktu ni lova tanpuitu ni thin turin Pu Lal Thanzara chuan Engineer rual te chu a fuih a, hna that leh that loh uluk taka vil thin turin a chah bawk.
    
MESA Annual General Conference hawnna inkhawm hi Vice President Er. Vanlaltlana’n a kaihruai a, Gen. Secretary Er. Lalropuia’n an hmalakna report pe-in President Er. K.Lalsawmvela’n member thar 17 te a lawmlut bawk. Chawhnu lamah hruaitu inthlanna leh rorelna hun an hmang dawn bawk a ni. MESA ah hian tunah member 399 an awm mek a ni.