Chief Minister Pu Lal Thanhawla chuan Village Councilte hi democracy inrelbawlna bulthuttu an ni a ti. He thu hi vawiina Kolasib Diakkawn YMA Halla Kolasib District Joint Village Council Assembly vawi 1-na a hmanpuinaa a sawi a ni.

Chief Minister chuan India ramah democracy nghet takin a ding reng a, sakhua zalenna leh hnam tenau zawkte rahbeh an nih lohna tura humhalhna leh hma an sawnna tura duhsakna te a awm vek a ni a ti a. Hetianga inrelbawl tur hian Village Council (VC)te chu a thutphah an ni a ti. Chuvangin he assembly a kalkhawmte chu Kolasib district chhunga mi pawimawh ber ber, mahni khawtlang theuh thatna tura mi thahnemngai te in ni a, mipui ten an chanvo dik tak an hmuh ngeina turiin rorelna dik leh tha an kalpui a tul a ni a ti.

Chief Minister chuan hun kal zelah VC te hnathawhna tur sum te a tam chho ve zel a, kuttling lova sum lak tum lo tur leh mipui rawngbawltu an ni tih hre reng turin a chah a. Khawtlang nun siam thatna ah mawh thui tak an phurh thu leh hei hian kohhran nun thelng a nghawng thei a ni a ti a.Chuvangin an hna thawhna reng rengah Pathian a rawngbawl tura a dahte an ni tih hria a, tui taka thawka, rinawmna, taimakna, dikna leh Pathian tihna nung nen kal thin turin a chah a ni. Sorkar hmalakna, abikin NLUP a kalpui mek chu a hlawhtlinnaah thui tak mawh an phur a ni tih hria a neitu rilru nen thawk thin turin a chah bawk a ni.

Assembly in resolution an pass zinga sorkar hnathawk Job Card nei lo tih chungchangah Chief Minister chuan Mizoram district danga sorkar hnathawk ten Job Card an nei thei anih chuan Kolasib district-in an neih theih lohna tur ka hre lo a ti a. sorkar hnathawk thenkhatin remti loa do tlat an awm anih chuan ka lo hrilh ang, a ti.

Kolasib District Joint Village Council hi nikum 2012 November ni 19 a din a ni a. A thil tum ber chu Kolasib District hmasawnna tur atana hmalak leh harsatna awmte sutkian anih theih nana tanrual a ni a.An hruaitute hi kum khat chhung atan ruat lailawk an ni. Vawiin session hmasa lamah resolution 8 an passed te zingah VC leh Village Employment Committee te inkara harsatna awm thin sutkian, VC lawmman phu tawk siam, district pum chhunga Higher Secondary School pakhat tal dah te,Kolasib district hospital tih changtlun, Kolasib district water supply siam that leh Kolasib town road development kalpuite a tel a ni.

Assembly inkhawm hi Joint VC Chairman lailawk Pu H.Lalchhandama, Kolasib College Veng VCP in a kaihruai a ni.

Chief Minister hi bialtu MLA Pu P.C.Zoramsangliana, Art & Culture Minister, Pu K.Lalrinthanga, Serlui bialtu MLA leh Pu Hmingdailova Khiangte, Tuirial bialtu MLA ten an tawiawm a ni.