1168/2023-2024

Aizawl, the 18th July 2023 : Land Revenue & Settlement Minister Pu Lalruatkima hovin vawiin khan amah Office Chamber ah Aizawl Ramhlun Sports Complex huam chhunga, Chite Rehabilitation Centre tiha, 2013 a Laipuitlang leimin, 2014 a Ramhlun Sports Complex leitawlh leh tunhnaia Hunthar leitlahniam a in leh lo chante hnena Sawrkarin in sakna tur inhmun a lo pek tawh tihfel dan chungchang ngaihtuahin Aizawl DC Dr. Lalhriatzuali Ralte, Land Revenue & Settlement leh Disaster Mitigation & Rehabilitation Department aiawhten meeting an nei.

Minister Pu Lalruatkima chuan helai hmun heng chhiatna thlenga, mahni in leh lo chan vek, chhena in neilote tan Sawrkarin helai bawr ram leiin chenna in sakna tur ram pek an nih dante a sawi a. Mahse LSC emaw House Pass emaw la tihfel ala nih loh avangin helai hmun neituten loan te pawh an la thei lova, chu mai bakah Sawrkar pawhin chhiah land revenue a chan zel a, chuvangin an LSC tur hi tihfel vat a tul thu a sawi.

Aizawl DC chuan helai hmuna inhmun pek dan leh ram pek tawh zat leh an dinhmun te kimchang takin a sawi a. Land Revenue & Settlement Department pawhin helai hmun an enfel leh tehfel dan, leh house site an siam zat te an tarlang a. Meeting chuan LSC pek dan chungchang sawiho hnuin allotee te LSC tihfel anih thei nan Aizawl DC hmalakna hnuaia a tul te tihfel vat anih hnua Sawrkarin LSC pek dan chungchanga hriattirna chhuahin tihfel nise tiin an rel a ni.

Chite Rehabilitation Centre, Ramhlun Sports Complex hi Sawrkarin mimal hnen atanga a lei niin helai hmun hi house site 100 ruahman a nih bakah thlanmual, sub-centre leh vangtlang hmun remchang te ram zuah a ni a. 2013 Laipuitlang leimin, 2014 Ramhlun Sports Complex leimin leh leitawlh leh tunhnaia Hunthar leimin a in leh lo chan vek, chenna in nei lo mi 80 chuang hnenah insakna tur hmun pek an ni tawh. Mimal engemaw zatin in lo te pawh an din tawh a mahse a ram neitu nihna LSC emaw House Pass emaw hi tihfel a la ni lova. Vawiin meeting chuan heng mite LSC tihfel dan an ngaihtuah a ni.