2691/2026-2027

Aizawl, the 15th October, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan ramri behchhan sumdawnna tihchangtlun dan tur chungchang Commerce & Industries leh Home Department hotute Conference Hall, Lok Bhavan-ah a sawipui.

Larsap General (Dr) Vijay Kumar Singh chuan nakin zel ngaihtuahin ramri behchhan sumdawnna tihchangtlun a pawimawh thu leh chumi atana tun atanga lo inpuahchah lawk a tul thu a sawi a. Insumdawntawnna kawngah harsatna a thlen tawh loh nan ruahmanna leh inkaihhruaina mumal zawk siam a tul thu sawiin, dan lova sumdawnna leh ramri kaltlanga thil dik lo tihte veng tura tanrual a pawimawh thu a sawi bawk.

Larsap chuan nakin lawkah kawngpui tha leh rel kawngte ramri thlenga siam a nih dawn thu leh chumi atana lo inpuahchah lawk a tul thu sawiin, heng project-te hi a zawh hun nghak lova a remchan lai leh hna thawh awlsam hunlaia a tul ang angte bawhzuia kan lo in rinlawk diam a ngai, ngaihtuahna zau tak senga ruahmanna tha tak kan siam a tul a ni a ti a. Official-te chu theihtawp chhuah chhunzawm zel tura chahin, mamawh hunah puih a inhuam reng thu a hrilh a ni.

He hunah hian ramri behchhana sumdawnna hmunhma pawimawh tak tak - Border Haat, Land Custom Station, Integrated Check Post leh Land Port chungchanga hmalakna leh hmachhawp awmte, harsatna tawh leh tul dangte sawi ho a ni a. Border Haat kalpui turin kalphung nghet leh mumal neih a tul thute, mumal zawka ramri behchhan sumdawnna kalpui dan turte bakah tihchangtlun nana tanlak dan turte sawi ho a ni a. Nakin zela hmasawnna ruhrel lo la awm turte thlir chung leh ngaihtuahna zau tak sengin Joint Working Group-in hmalak dan tur ruahmanna huam zau tak duang se, chu chu thuneitu sang zawka thlena a hlawhtlin thuai theih nana hmalak ni se tih a ni.

He hunah hian Pu Vinod P. Kavle, Commissioner & Secretary to Governor, Dr. H. Lianzela, Secretary, Commerce & Industries Department, Pu Vanlalmawia, Secretary, Home Department leh official pawimawh dangte an tel a ni.