2690/2026-2027

Aizawl the 15th October, 2026: Vawiin khan School Education Minister Dr Vanlalthlana chuan MBSE Conference hall-ah MBSE buatsaih Random Examination 2025 Report card leh Mobile App pahnih – Confidential Material Tracking & Monitoring System (CTMS) leh School Report System (SRS) a tlangzarh.

School Education Minister chuan tlangzarhna inkhawmah hian thusawiin zirlaiten an zir chhuah a pun theih nan sum neih loh chhuanlam a awm thei lo a ti a. Kan ram zirnaah hian Subject hrang hrangah rampum huap chawhrual National Average kan la pha lova, hei hi pha tura kan tan a ngai a, Random Examination leh Common Question-te hian min puih theih beisei a ni a ti. Random Examination 2025-ah zaa 65-in an pass thei chu lawmawm a tih thu sawiin SCERT-in Standardized Assessment for Elementary Schools (SAfES) a kalpui bawk a, heng hian kan zir chhuah a tihsan beisei a ni a ti.

Minister chuan zirlaiten a bulthut an thiam loh chuan entrance hrang hrangah kan dinhmun a sang thei lo tih sawiin a lo lan chhuahna a ler thlir mai lovin a bul chhui a ngai a, tui pawh khawi atanga put nge tih dap chhuaha tihpin a ngai thin a ti a. Mizoram chhunga damdawi ti an tam dan sawiin India ram pumah a ti nasa ber kan ni a, hei hi khawi atanga lo intan nge tih kan chhui a ngai a, middle school an kal lai atangin sual an zir tan a. Chuvangin, state drug policy, India ram pumah a nei hmasa ber kan ni dawn a, tunah hian District-ah inrawnkhawmna kalpui mek a ni a ti a. Middle School atanga moral reform tan tum a ni a, an en duh zawng comics hmangin awm dan mawi, nungchang tha, tlawmngaihna leh aia upa zahna te pawh inzirtir tum a ni a ti bawk.

Minister chuan zirna siamthat nan Question design a that a ngai a, Random Examination leh Common Question-te hian min puih theih beisei a ni a ti bawk. School thenkhatin Class IX Syllabus an zirtir kim lova, zirlaiten a bul thut an man loh phah a, an kal zelnaah harsatna an tawk tih sawiin zirtirtute chu a kim thei ang bera zirtir turin a ngen a ni. Zirna kalphung rem fel zel a ni dawn tih sawiin hei hian zirtirtute leh zirlaite a nawr dawn a, hma kan sawnpui ngei kan beisei a ti bawk.

School Education Commissioner & Secretary Pu K.Lalthawmmawia pawhin he hunah hian thusawiin Mobile App tlangzarh chuan khawvel hmasawn chak tak karah hnufum bik ni lo tura min puih ngei a beiseiawm a ti a. Digital khawvelah hian midang aia hnufum lo tura tan lak a ngai a, heng hmalakna te hi zirlaite tan a ni a, zirlaiten thiamna, finna leh puitlinna an neih theih nana kan buatsaihna a ni tih chian a ngai a ti bawk.

MBSE Secretary Pi Sarah Lalengzami Pachuau pawhin thusawiin Mobile App tlangzarh chu Board Exam tihchakna hmanrua tur a ni tih a sawi a, heng mobile App te hi Samagra Shiksha atanga sum hmuh hmanga duan a ni tih a sawi bawk.

MBSE Deputy Secretary Pu Lalrinmawia Ralte pawhin Random Examination 2025 dinhmun tlangpui te, CTMS leh SRS kalhmang turte a sawifiah bawk.

Class IX ten Random Examination 2025 an neih takah khan kan state dinhmun hriat nan class 3,6 & 9 ah te Mizoram chhunga District tinah Random Examination hi buatsaih a ni a, School 232 a zirlai 8,856 ten exam an hmachhawn a ni. Random Exam-ah hian Subject 5- English, Mizo, Mathematics, Science leh Social Science-ah te zawhna siam a ni a, subject tinin mark 20 zel a pu a, MCQ hmanga exam a ni. Mi 5,778 ten mark zaa 40 an hmu a, pass-a puan an ni a, zaa 65.24 an pass a ni.

Confidential Material Tracking and Monitoring System (MBSE-CTMS) hi Board Exam Centre Superintendent-ten Exam thil pawimawh chi hrang hrang vawn that, chhui leh report nan hman a ni dawn a, School Report System (MBSE-SRS) chu Exam chungchanga Board leh School-te indawr tawnna tura ruahman a ni.

Vawiina MBSE-in  Random Examination 2025 Report card leh Mobile App pahnih  tlangzarhna hi MBSE Chairman Pu JH Zoremthanga’n a kaihruai a, School Education Minister bakah Commissioner & Secretary Pu K.Lalthawmmawia, Director Pi Angela Zothanpuii, SCERT Director Pi Carolyn Zoramthangi, Samagra Shiksha SPD Pu C.Lalthanzira leh Officer-te, District tin atanga kalkhawm zirtirtute an tel a ni.