Vawiin chawhma ah khan Raj Bhavan ah Larsap Lt.Gen. Nirbhay Sharma (Rtd.) leh Mizoram rawn tlawhtu Union Minister of State For Agriculture Pu Sanjeev Kumar Balyan te chuan inkawmna an nei a.

Mizoram mamawh leh theihna hrang hrang te Larsap hian Union Minister chu lo hrilh in Agriculture & Allied Services sector ah Mizoram chuan puih a mamawh zual a ni ti a. International Boundary thui takin a hual vel Mizoram chu Central in a ngaih pawimawh bik a tul thu lo sawi hmuh in Mizoram ah hian hmasawnna ruhrel dinna atana pawimawh ber pakhat remna leh muanna a awm a ni a ti. Kawng leh inkalpawhna tha zawk Mizoram in a neih phawt chuan pawn lama hralh chhuah tur tam tak a thar chhuak thei a, inkalpawhna tha zawk nei turin Mizoram pawh a inpuah chah mek tih a sawi a. Kaladan Multimodal Transit Transport Project , India tana a pawimawh dan tur hrilh in Mizoram chhunga leh ramri a luipui luang te chu ram chhung inkalpawhna leh bungraw thiarna atana hman tangkai theih a ni thu lo a hrilh a. Union Minister of State For Agriculture Pu Sanjeev Kumar Balyan chuan Central in hmarchhak state a dah pawimawh thu sawiin Mizoram Inland Water Ways potential chungchang pawh Prime Minister Pu Narendra Modi a lo sawi pui dawn a ni a ti a. Mizoram in a thar chhuah tam tak market mumal loh vanga riral chungchang te pawh a hriat thu sawiin ruahmanna tha zawk ngaihtuah pui a tum thu a sawi bawk.Union MOS rawn zuitute chuan Governor hnenah Mizo mipuiin rem an tih phawt chuan Mizoram a sumdawnna leh company rawn din duh entrepreneur tam tak an awm thu an sawi a. Tualchhung mite rilru inhawn leh hawn loh ngaichan hmasak erawh a pawimawh hle nia an hriat thu Governor hi an hrilh a ni. Larsap chuan Mizo mipuite thinlung an in hawn tawh thu sawiin Mizo hnam leh nihphung zah sak nachang hria tan harsatna a awm a rin loh thu a sawi a. Mumal zawkin sawrkar mi pawimawh leh pawl hruaitute nen dawhkan khatah an sawi ho theih nan remchang a lo zawn sak tur thu a hrilh a ni. Mizoram ah sumdawnna thil a bul tan tur tan chuan Mizoram sumdawng mite thawhpui tel tha ber a a rin thu a sawi bawk.