Zan khat riaka Mizoram rawn tlawh, Union Minister of State for Agriculture Dr. Sanjeev Kumar Balyan chuan vawiin chawhma khan Chief Minister Pu Lal Thanhawla chu a chenna bungalowah a hmu.

Chief Minister chuan Selesih a Central Agriculture University hnuaia College of Veterinary Science & Animal Husbandry a zirtirtu hna sanction post awmte chu hnawhkhah thuai nise tiin Union Minister hi ngenin, tualchhung mi qualified te chu duhsak bik turin a chah a. Agriculture hnuaia central project kalpui tura state sorkarin 50% tum ve tura central sorkarin a tih chu Mizoram sorkar chuan a tlin loh tur thu a hrilh bawk a. Thenzawla Horticulture college din turah, a taka kalpui anih hmain Selesiha Vety Science College ah ICAR in a tlachawpin kum 2016-17 session ah Academic session bul lo tan se tia ngen an nih thu Union Minister hi a hrilh bawk a ni. Dr. Sanjeev Kumar chuan Agriculture bikah chuan central project funding pattern tihdanglam chu hmarchhak state te tan ennawn anih tur thu Chief Minister hi a hrilh a ni.

Chief Minister hian Union Minister of State hi duhsakna thilpek a hlan bawk a. Dr. Sanjeev hi a Assistant Private Secretary Naveen Kumar leh a mikhual mi pahnih dangten an rawn tawiawm a ni.