4009/2022-2023

Champhai, the 28th March, 2023: Sawkar hmalakna leh hmachhawp hrang hrangte tlawh leh zirchianga Champhaia cham mek Law & Judicial Minister Pu T.J. Lalnuntluanga chuan vawiin chawhma dar 10:30 khan Govt. Champhai College (GCC) tlawhin thawktute kawmna hun a hman bakah College tihhmasawn kawnga pawimawhte sawipuiin hmalak tulte a enfiah. Law & Judicial Minister hi Bawrhsap Pu James Lalrinchhana chuan a tawiawm a ni. Pu T.J. Lalnuntluanga hi Principal Pu P.Lalhmingliana bakah IQAC Coordinator leh College Zirtirtuten an lo dawngsawng a ni.

Govt. Champhai College Seminar Hall-a inkawmho hun tawi neihah Law & Judicial Minister Pu T.J. Lalnuntluanga chuan Champhaia zirna sang pawimawh tak, Govt. Champhai College tih hmasawn leh chei changtlun kawngah Sawrkarin theihtawp chhuah zel a tum thu a sawi a. Govt. Champhai College chu College a lo kal tawhna a nih thu pawh tarlangin, College hminga Principal-in dilna leh mamawh a thlente chu theihtawp chhuaha bawhzui a tum thu a sawi bawk.

College Zirtirtu leh Non-Teaching Staff indaihlohnate phuhru turin Sawrkarin hma a lak mek thu leh theihtawp chhuaha nawr zui a tum thu a hrilh a. Minority Affairs kaltlanga Chhangphut Field lam dep kopang breast wall remna tur bawhzui tum a nih thu leh PMJVK kaltlanga Examination Hall ruahman tura hmalak mek a nih thu a sawi bawk a. Govt. Champhai College tih hmasawn leh thuamthat bakah Zirlai tha tak tak chherchhuah kawngah theihtawp chhuah zel turin thawktute a chah bawk.

District Bawrhsap Pu James Lalrinchhana pawhin College tih hmasawn leh thuamthat kawnga pawimawhte sawiin thawktute fuihna thu a sawi bawk a. Zirtirtuten an ngaihpawimawh zawngte thlenin inkawmhona hun tha tak hman a ni.

Inkawmhona hun hman bakah hian Chhangphut Field leh College inkara breast wall rem dan turte pawh enfiah a ni a. Exam Hall, Botanical Graden bakah RUSA hnuaia Commerce building sak tharte enho nghal a ni bawk a. Hmalak ?ul leh mamawh hrang hrangte sawiho nghal zel niin, theihtawp chhuaha hma lak zui a nih tur thu Minister Pu T.J. Lalnuntluanga chuan a sawi a ni.