4008/2022-2023
Lunglei the 28th March' 2023: Nimin chawhnu khan Lunglei District Level Monitoring Committee on Central Sector Scheme " Formation and Promotion of 10,000 Farmer Producer Organisations (FPOs)" chu an Chairman Pi Ramdinliani, IAS, Deputy Commissioner, Lunglei kaihhruaiin DC Conference Hall ah an thukhawm. He Scheme in a tum ber chu kuthnathawktuten awmze nei leh hlawk zawka an thawhrah an seng theihna tura mumal taka an thawhhova an inzawmkhawm theihna tura Farmer Producer Organisations (FPOs) kaltlanga hmalak a ni.

Pi Ramdinliani, Deputy Commissioner & Chairman, D-MC chuan Lunglei District-chuan he scheme hlawhtling taka kalpui a nih theih dan tur ruahmanna (strategy) chungchangah ngun taka ngaihtuahna seng turin a sawm a ni. Marketing lama hlawhchhamna hi loneitute tan eizawnna rintlak leh hlawkthlak tak neih theihna dal tu pakhat a nih thu sawiin, lo neih chu District chhungah eizawnna atana hmang an la tam ber a ni, a ti. FPOs hian thlai tharchhuah leh hralhna kawngah mawhphurhna sang tak an nei tih a sawi a, Deputy Commissioner chuan Cluster Based Business Organization (CBBO) leh FPOs te chu regular market-a inelna nei thei tura thlai tharchhuah tha zawk leh mawi hnai zawk enkawl turin a fuih bawk.

T. Evan Munsong, DDM, NABARD & Member Secretary D-MC chuan D-MC hmalak tawh hrang hrang leh hmachhawpte sawizauna hun a hmang.

Meeting ah hian Lunglei District chhunga Farmer Producer Organisations (FPOs) hmalakna kal mekte leh hmachhawpte ngaihtuah ho a ni. Tun dinhmunah Lunglei District chhungah FPOs pathum din tawh niin chungte chu Glover Organic Pvt.LTD hnuaiah Vanva Dragon Fruit Farmer Producer Company Ltd, Margdarshak Development Projects and Consulting Pvt. Ltd. hnuaiah Bunghmun Farmer Producer Company Ltd leh North East Initiative Development Agency(NEIDA) hnuiah Lushai Agriculture Producer Company Ltd.te an ni. Heng FPOs te hian serthlum, dragon fruit, hmarcha, kuhva, thingfanghma, aieng leh hmunphiah te thlan chhuah tawh niin heng thei leh thlai chin leh hralhchhuah kawngah hma an la dawn a ni.

Meeting ah hian NABARD leh Lead Bank hotute bakah Line Department hrang hrang Agriculture, Fisheries, Co-Operation, KVK, Animal Husbandary & Veterinary te leh Glover Organic PVT. Ltd, Margdarshak Development Projects and Consulting Pvt. Ltd. leh North East Initiative Development Agency (NEIDA) aiawhte an tel a ni.