Hleprukna venna tura sorkar-in dan a ruahman mek Lokayukta chungchanga inrawnkhawmna PRISM-in vawiina I&PR Conference Hall-a an buatsaih chu Law Minister Pu Lalsawta’n a hmanpui.

Minister chuan hleprukna-in ram leh mipui tan pawi a khawih nasat theih zia hriain khawvel ram tinah a ven nan hma lak mek a nih thu a sawi lang a, Mizoram Sorkar pawhin a tihbona tura theihtawpa hma a la mek thu a tarlang bawk. Natna avanga damlohna chu damdawi hmanga enkawl dam theih a ni a, eirukna kaikuang duhamna erawh a enkawl nan damdawi a awm lo a ni, a ti. Sorkar hnathawk te pawh ram sum leh pai dinhmun a that chhoh zel avangin an hlawh pawh tihsan chhoh zel a ni a, khawsak nuam pangngai takin an awm thei a ni tih hriatpui a pawimawh thu sawiin a lutuk erawh a awm theih thu a sawifiah bawk. PRISM ten eirukna do tura an hmalakna chu fakawm tiin sorkar nen tanghova lungrual taka hmalak chhoh zel a duhawm thu sawiin Lokayukta chungchanga an rawtna te chu sorkar ah thlen zel turin a chah bawk.

Vawiina Lokayukta inrawnkhawmna ah hian Minister hi sorkara dan lama mithiam Law Secretary Pu P.Singthanga leh Pu R.C.Thanga Public Prosecutor te pawhin an tawiawm a ni.