Vawiin khan School Education Minister Pu H Rohluna chuan State pum huam Science, Mathematics leh Environment Exhibition vawi 34-na chu Govt. Chaltlang High School-ah a hawng.

Minister chuan tunlai khawvel hi Science leh technology intlansiakna khawvel a ni a, ram hmasawnna bul intanna pawimawh tak chu science thiamna a ni, a ti. Zirlai nih lai atanga midangte hmuhchhuah sa leh an tih dan entawn lova mahni rilru puakchhuak thiamna hmanga thil thar hmuhchhuah leh siam chhuah ngaihhlut nachang hriat a pawimawh, a ti a. Sorkar laipuiin policy a duan tam zawk chu phairam mil a nih avangin kan chenna tlangram mila keimahni ram chhung a mithiamte ngeiin kan ram than chhoh zel dan tur leh hmasawnna turte, eizawnna kawng tha te duang chhuak a, ram leilung hausakna leh ram leilung hman tangkaina kawngah engtinnge tan kan lak theih ang tih ngaituahna kan neih a tul hle, a ti. Pu H.Rohluna chuan ni hnih awh tur Science Exhibition chu tluang taka nei tura duhsakna hlanin zirlaite rilruah taimakna leh hlawhtlin tak tak duhna thinlung a tuh ngei a beisei thu a sawi a ni.

SCERT hnuaia Science Promotion Wing chuan kum 1979 atang khan State pum huap Science Exhibition a buatsaih thin a. He exhibition in a tum ber chu zirlaite thinlungah science leh technology ngaihhlutna leh ram hmasawnna atan a pawimawhzia hriattir a ni. Tun tumah hian thupuiah “Science & Mathametical Innovation” hmangin Higher Secondary School pali leh High School sawmparuk atangin zirlaite’n an thil siam chhuah (model) 71 an phochhuak a. Exhibition-ah hian Prof.Lalnundanga, Dept. of Forestry, MZU; Pu Lalrinthara Pachuau, Asst. Prof., Dept. of Physics, Pachhunga University College leh Pu J.Lalvohbika, Asst.Prof., Dept.of Mathematics, Pachhunga University College te chu endiktu (jury) an ni.

Science, Mathematics leh Environment Exhibition vawi 34-na hawnna inkhawm hi SCERT Director, Pi Malsawmthangi’n a kaihruai a. NCERT, New Delhi atanga lokal Dr.Chong Shimray bakah MBSE President Rev.Dr.Lalchungnunga, DIET Principal leh officer dangte an tel a ni.