Vawiin khan Lawngtlai DC Conference Hall-ah Lawngtlai District NLUP Implementing Committee chu an thukhawm a, Line Department hrang hrangte hma lak tawh chin leh hma lak zel dan tur an sawi ho.

Chairman Pu J. Hmingthanmawia, Lawngtlai Bawrhsap nibawk hova meeting ah hian Line Department hrang hrang ten NLUP tanpuina an sem tawh chin leh a dawngtuten hma an lak tawh dante an report a, District Committee in a lo rel tawh anga NLUP dawngtuten an hman dan enzuina tura ruahmanna siamte pawh a nih angin kalpui a ni em tiin an thlir let bawk. Line Department te hian NLUP tanpuina an sem hnuah a dawngtuten an hmang dik em tih enzui leh nghal zel a ni a, hetianga vil zuina tha taka kalpui a nih thin avang hian tha taka hmang an tam phah hle nia sawi a ni. Tha taka kalpui tawklo, an pawisa dawn tur hren sak mek te pawh an la awm bawk. Heng hote hian an tanpuina dawnte a nihna ang taka an hman hunah tanpuina hi pek chhuah chauh tura ruahmanna siam a ni.

Pu. J Hmingthanmawia chuan Line Department te chu taima taka thawk chhunzawm zel turin a fuih a, NLUP tanpuina semchhuahte a nihna ang taka hman a ni em tih enzui zel chu ngai pawimawh tur leh a enzuina kawngah harsatna an tawk a nih pawhin tanpui zel a inhuam thu a hrilh a ni.