Vawiin khan Lawngtlai Central YLA Hall-ah kum 2014 Chapchar Kut chu Hlukhla- Chapchar Kut tia vuahin hlim taka hman a ni a, LADC Executive Secretary Pu C. Zoramthanga chu kut thlengtu niin Pu R. L Sangluaia, Additional DC Lawngtlai District chu Kut Pa a ni.
Kum dangah chuan Chapchar Kut hi Playground ah hman ni thin mahse kumin erawh hi chu remchan zawkna a vangin Hall ah hman a ni a. Kut thlengtu Pu C. Zoramthanga chuan hmanlai ata tawh kan pi leh puten he ni hi inhmangaih thar lehna ni, inhau leh insual buai pawh phallova an lo hman thin awmni kham ni a nih thu sawiin tumah rilru thalo pu lova hlim taka hmang theuh turin kut hmang tura kalkhawmte a chah a.
Kut Pa Pu R. L Sangluaia pawhin sawrkar remtihna thlapa awmni khama hman Chapchar Kut chu hlim taka hmang tura kalkhawmte chahin kum tela uar chho tial tial turin a fuih bawk. He ni hi kan hnam zia rang leh nunphungte a taka kan lantir theihna hun tha a nih rualin thangthar lo awmzel turte tana inzirna hnu tha a ni bawk a. Thangtharte hian kan hnam ziarang kan hriatloh chuan a hnam angin kawng kan bo tihna a ni a. Thalaite hian kan hnam zai, hla leh lam te kan hriat ngei ngei a ngai a, ram danga kal changa hnam aiawhtu nih tak mai ni a tam tawh si a, chumi hun a tan pawh chuan inbuatsaih a ngai nasa a ni a ti bawk.
Vawiina Kut naah hian LIKBK, Bazar Local Church zaipawl ten “Aw nang kan Lal kan Pathian” tih hla hmanga hun hawngin zai leh lam chi hrang hrang ngaihthlaka thlir ho a ni a. Pawhlohthlawh Zai chu LADC Art & Culture Department in an entir a, Sakei huai beih dan chu MUP, Lawngtlai Sub-Headquarters ten lemchan hmangin an entir bawk a, tin, YLA Council Branch ten Chawnglaizawn leh Chheihlam an entir bakah Hlukhla-Chapchar Kut Miss 2014 thlanna te neih a ni bawk. Hei bakah hian Zaithiam, Lamthiam leh Fiamthu thiam ten kalkhawmte an awi-hlim reng bawk a ni. Hlukhla Kut hi Lai thlahtu pi leh pute lo hman thin kut chi khat, mithi tawhte pual deuhva an lo hman thin a ni a. Tunlai hunah hetiang kut hi hman ni tawhlo mah se, Chapchar Kut nena kaikawpin kumin ah hian Hlukhla-Chapchar Kut tiin Lawngtlai ah hian hman a ni ta a ni.
