Vawiin ah khan Lawngtlaia Central YLA Hall ah NLUP Intuaitharna hun (NLUP Revitalisation Programme) neih a ni a, Minister of State Pu C. Ngunlianchunga chu khuallian ani. Hetiang bawk hian Chawngte Art and Culture Hall ah NLUP intuaitharna hun hi hman niin Minister of State, Dr. Buddha Dhan Chakma chu khuallian a ni.

Lawngtlai-a NLUP intuaitharna inkhawm Bawrhsap Pu J. Hmingthanmawia kaihhruaia neih ah hian Mizoram sawrkar Flagship Programme NLUP hmalak zel dan tur inhrilhhriatna neih a ni a, 3rd Phase leh 4th Phase a NLUP dawngtu turte hnenah sawrkarin ruahmanna a neihte sawi lan a ni.

Khuallian Pu C. Ngunlianchunga chuan pawisa sem ringawt hi sawrkar thil tum a ni hauh lova, mirethei leh harsa zawkten leirem an rah ve theihna tura tanpui chu sawrkar rilru zawk a ni. Chuvang chuan a dawngtu mipuiten dik tak leh fel taka an tanpuina dawnte an hman a ngai a, chutiang tak chuan an hmang ngei em tih enfiah zel a ni, hetianga enfiahna hi uar chhoh deuh deuh a ni ang a ti bawk.

Khualzahawm Pu V. Zirsanga, CEM LADC pawhin thusawiin mipuiten sawrkar atangin an dinhmun an siamrem vena tur sum a thlawnin an dawnga, mahse a dawngtute chuan dinhmun sawhngheh pui nan hman nachang an hre leh lo thin si hi a pawi em em a. He rilru hi kan bansana, rilru puitling tak kan put hi a hun hle a ni a ti.

Inkhawm kaihruaitu Bawrhsap Pu J. Hmingthanmawia chuan NLUP dawngtuten an tanpuina dawnte an hmang tha em tih enfiah hna hi khauh zawka kalpui a nih tur thu leh a hmang thalote chu tanpuina dawng zel tura kalpui an nih ngawt loh tur thu a sawi a, NLUP dawng tura thlan chhuah kalkhawmte chu rilru thar pua, intuai hriam turin a fuih bawk.

Khuallian hian CM NLUP Special Scheme atanga NLUP dawngtute hnenah leh AH & Vety hnuaia Bawng vulh thlangtute hnenah tanpuina a sem nghal a, CM Special Scheme dawngtute hian sumfaiin an dawng a, Bawngvulhtute erawh hi chuan Bawngchaw channa (Chuff Cutter) khawl an dawng thung a ni. He inkhawmah hian Line Department aiawhin Dr. Lalnunhlima Ralte, District Vety Officer chuan thusawina hun a hmang bawk.

Chawngte-a NLUP tharthawhlehna inkhawm hi Lawngtlai SDO Sadar Pu Lallawmawman a kaihruai a, Khuallian Dr. Buddha Dhan Chakma leh khualzahawm Pu Lila Budhha Chakma, CEM, CADC ten thusawina hun an hmang a. NLUP Line Department aiawhin Pu H. Joela, District Agriculture Ofiicer; Lawngtlai chuan thusawina hun a hmang bawk.