Mizoram State Level Co-ordination Committee for Persons with Disability chu vawiin chhun dar 1 khan New Secretariat Conference Hall, Khatla-ah an Chairman Pu P.C. Lalthanliana, Social welfare Minister hovin neih a ni. Parliamentary Secretary Pu K. Lalrinthanga, SWD Commissioner Pu Arun Goel IAS, Pi B. Sairengpuii Commissioner Person with Disability leh SWD Director Pi Vanlaldini te leh sawrkar Officers pawimawh tak tak he committee member te an kal tha hle a ni.

Social Welfare Minister chuan kalkhawm member te chungah lawmthu sawiin "Heng ka unau te berte zinga mi pakhat chunga in tih chu ka chunga ti in ni" ti tu hnungzui a, Pianphunga Rualbanlote tana an hmakhua leh hamthatna tur ngaihtuahtute an kalkhawm leh thahnem ngai tak maia theih ang tawka an hmalakna chu lawmawm a tih thu sawiin, committee thuchhuak te chu tu mimal tan mah a hlawkna nilo Rualbanlo leh chanhaite tan liau liau a hamthatna tur anih avangin ropui a tih thu a sawi a ni.

He Meeting hian Mizoram sawrkarin Rualbanlote tana unemployment allowance, Pension leh Student stipend a lo pek thinte sawrkarah a remchan dana tihpun nise tih thlen te, Disabled persons tana 3% post reservation 2007 te pawh ennawna hmalak zui ngaihna ah hmalak zui nise, Mizorama Rualbanlote Certificate siam sak chungchangah la pek loh te chakzawka pek theih dan ngaihtuaha remruat nise tih te, Mizoram sawrkar Building leh Puipunna Building ang chi ah RAMPS Wheelchair kal theihna siam vek tura chak zawka hmalak nise an duh thu te, North Eastern Regional Centre (NIOH) in Mizorama Office leh Training Institute an dinna tura tana Ram (Hmun) sawrkara dil nise tih te an rel thlu a ni.