Vawiin hian Lawngtlai Divisional Horticulture Office Conference Hall ah Horticulture Department hnuaia NLUP dawngtu mi 58 te hnenah NLUP 2nd Phase 3rd Installment sem a ni a, Pu R. Lalsangluaia Addl. DC chu khuallian a ni.

Khuallian chuan ramchhung mipui tam tak zingah NLUP dawng tura thlanchhuah te chu mi vannei tak an ni a a hriat thu a sawi a, NLUP dawngtute hian a pe tute timualpho lo turin a ngen a, tha tak leh dik taka thawk a eizawnna ngelnghet neih pui theuh turin a ngen a ni. Huan thlai siam hi mihring te nunphung tura a tir ata pathian in min kawh hmuh a ni a, mihring hmasa ber te pawh thei chi hrang hrang awmna Eden huanah a dah a ni. Hei vang hian huan thlai siama eizawng te hian dinhmun pawimawh tak an luah a ni, a ti.

Vawiin a Horticulture Department hnuaia NLUP dawng te hi mi 58 an ni a, an zinga pakhat hian Kuhva huan thlangin, a bak zawng te hi Serthlum huan thlang an ni. An zavai hian Rs. 9000 theuh pek an ni a, Rs. 6000 hi leitha lei na tur a ni a, a dang Rs. 3000 hi huan siamremna tur atana pek an ni thung.

He hun kaihruaitu Pu L. Lalhmingmawia Pachuau, DHO Lawngtlai in a tarlan dan in NLUP 1st Phase ah Horticulture hnuaiah chhungkua 1679 te tanpuina pek an ni a, 2nd Phase ah chhungkua 719 thlan niin 3rd Phase ah chhungkua 187 an ni a, 4th Phase ah chhungkua 102 thlan chhuah an ni thung. Vawiin hian Lawngtlai leh a chhehvel khua hnaivai hnenah sem a ni a, District chhung hmundang ah pawh sem chhunzawm leh zel tur niin 3rd Installment ah hian Rs. 64.7 lakhs sem tura ruahman a ni.

Vawiin a NLUP sem naah hian khuallian Pu R. Lalsangluaia te, Pu L. Lalhmingmawia Pachuau DHO te leh Pu K. Saitluanga, District Media Officer NLUP ten a dawngtute hnenah tanpuina hi an hlan a ni.