Tukin zing dar 8:00 khan Lawngtlai Bazarah ni 30th Jan - 3rd Feb, 2012 chhung awh tur Road Safety Week chu Pu Beila Khithie, Election Officer in a hawng. Hawnna inkhawm hi Lawngtlai DTO Pu T. Vanlalmalsawmsanga’n a kaihruai a, Pu C.L. Zathang, Asst. DTO chuan Vote of Thanks a sawi a ni. Road Safety Week hawnnaah hian Lawngtlai khaw chhung atanga kal tura beisei te an kal tha hle a ni.

Pu Beila Khithie chuan hun rei tak DTO hna a lo chelh tawh atanga motor neitute leh motor khalhtute mamawh nia a hriatte bakah Sorkar leh mipui tanrual a tulzia a sawi a. Driver te chu anmahni leh midang nunna te, motor himna te an kutah a awm tih hre turin a chah nawn a. Road Safety Week chu motor khalhtute tih tur leh tih loh tur inzirtirna hun tha tak a ni tih a sawi bawk.

Road Safety Week kharna hun chu CYLA Hall, Lawngtlai - III ah ni 3 Feb, 2012 ah hman a ni dawn a, Driving Etiquette, Traffic Rules leh MVI dan hrang hrangte inzirtirna hun hman a ni ang. Kuminah hian Road Safety Week hi district pali - Aizawl, Saiha, Lawngtlai leh Mamitah te hman a ni a. Theme atan “Accidents bring tears, safety brings cheers” tih hman a ni.