Road Safety Week, 30th January - 3rd February, 2012 chhunga hman tur chu vawiin khan Chhim Veng YMA Hall, Mamit-ah Pu Sangawia, SP Mamit chuan a hawng.

Hawnna inkhawm Pu Thomas Lalrammawia, Civil Judge kaihhruaiah thusawiin khuallian chuan driver te hi ram hmel ti mawitu an ni tiin, khual nek hmasatute an ni a, hawihhawmna leh rinawmna, an passenger te chungah an lantir hram hram thin tur a ni, a ti. Chetsualna hi ruih theih thil avanga lo awm thin a nih thu tarlangin lirthei khalh lai chuan hemi kawngah hian kan fihlim ngei ngei tur a ni, a ti bawk.

Khual zinna kawngah horn pek kan uar deuh deuh tur a ni, tiin keini aia hmanhmawh emaw kal hmasak tul zawkte kawng ken nachang hriat hi thil tul tak a ni, tiin kalkhawmte chu a chah bawk. Passenger te chungah an hawihhawm thin tur a ni a ti bawk.

Khual zahawm Pu V.L. Remliana, SDO (S) pawhin thu sawiin tumruhna nena lirthei khalhtute tan hlawhtlinna a awm a ni, tiin hawihhawmna vawng reng turin kalkhawmte a chah bawk.

Pu R. Lalnunmawia, DTO Mamit pawhin Road Safety Week kan hman dan leh kan hman chhan te a sawifiah bawk a ni.

He Road Safety Week hawnnaah hian Mamit khawpuia Maxi Cab Driver tha F. Kapthanga s/o Zalala, Mamit leh Taxi Driver tha ber a thlan Ramsangzela s/o H. Vanlallawma, Mamit te hnenah chawimawina Certificate hlan an ni bawk.

He Week hawnna inkhawmah hian Mamit khawpui chhunga Maxi Cab Owners leh khalhtu te, Taxi khalhtute leh helama mawhphurtu officials engemaw zat leh khawtlang hruaitute an tel tha hle a ni.