Vawiin khan Lawngtlai ah Sensitization Workshop on District Level Planning neih a ni a. Lawngtlai Chanmary YLA Hall, Chanmary Inpui ah Planning & Programme Implementation Department hotu ten zirtirna an pe a ni.

He Sensitization Workshop hi hun hnihah then niin, hun khatna chawhma lam chu Lawngtlai DC Pu N. Chakhai chuan a kaihruai a.

Pu Saihlira, Principal Adviser cum Addl. Planning Department hnen atangin United Nations Sustainable Development Goals chungchang ngaihthlak niin, heng UN in a thiltum 17 chu kum 2030 a tihhlawhtlin turin lungrual taka an pawm a nih tawh thu te, Sustainable Development Goals chu National leh State Level-ah hmalak mek zel a nih thu te, India ram pum huapa he Programme kalpuitu chu NITI Aayog a nih thu leh State tinah Planning Department chu Nodal Department a nih thu sawiin, mimal tin thleng phak hmasawnna thlentir chu a tum ber a nih thu a sawi.

He huna khuallian Pu T. Zakunga, LADC-a Chief Executive Member chuan India ramin hma a sawn rualin Mizoram pawhin hmasawnna kawng a zawh zel theih nan theihtawpa hmalak a nih thu a sawi a. Huapzo hmasawna nei tur chuan Plan fel tak nei a kal a pawimawh thu sawiin, hemi chungchanga Workshop neih a, mithiamte zirtirna an dawng chu lawmawm a tih thu a sawi a. Pu T. Zakunga chuan Mizoram chhunga District hrang hrangte rualkhai taka hmasawnna rahbi kan zawh theih nan ruahmanna fel tak neih angai a ni tiin Lai Autonomous District Council ah pawh Planning Board neiin, hmasawnna rahbi kan zawh theih nan Board chuan ruahmanna a nei thin a ni, a ti bawk.

He Workshop-ah hian Planning  & Programme Implementation Department, Aizawl atangin mithiam ten kalkhawmte hnenah zirtirna an pe a, hmasawnna chu mi zawng zawng thleng phak anih tur thu te ngaihthlak a ni. He hunah hian Lawngtlaia State Deptt Officer te leh NGO hruaitu hrang hrangte bakah, LADC a Executive Member leh MDC te bakah, Political Party hrang hrang aiawhte an kalkhawm a ni.