Vawiin khan Lunglei Lead Bank Office buatsaihin DC Conference Hall- ah Lawngtlai District Consultative Committee, District Level Review Committee leh District Level Security Committee chu an  Chairman Pu J. Hmingthanmawia, Lawngtlai Bawrhsap hovin neih a ni a, nikum December thla atanga kumin March thla inkara Bank hnathawhte an thlir ho.

Chairman Pu J Hmingthanmawia chuan, Bank te chu mipuite sum vawngtu leh mipuite dawmkanna tur sum thehchhuak theitu an nih avangin dinhmun pawimawh tak an luah a, sawrkar pawhin Bank te tihtur pawh mumal takin a zam a ni. Heng sawrkar in tih tura a tihte ngaihthaha mahni sahmin tihpuarna ringawt ngaihtuah Bank kan lo awm a nih chuan inseam that thuai a tul dawn a ni. Vawiin Meeting Report atanga lo lang chhuak hmasawn tulna kawng hrang hrangte chu chak taka um zui thuai turin Bank enkawltu kalkhawmte chu a chah bawk.

Meeting ah hian Pu James L H Pachuau, Chief Manager, SBI, Lunglei Lead Bank chuan Report a pe a, report te chu thlir hovin hmasawn ngaihna lai leh siamthat ngai thil hrang hrang te an sawi zui nghal a ni.

Meeting thurel tlangpui chu - Canara Bank te, HDFC Bank te leh MRB Chanmari Barnch te chuan Pawisa dawn khawm zawng zawng atanga puk chhuahtir tur zat bituk hniam ber (60%) an tlin theih nan hma la se, Agriculture lama hmasawnna tur atana Loan tam zawk pe chhuak turin Bank zawng zawng ten tan la se, KCC lending a hnufual hoten chak zawkin hma la se tih te, Financial Literacy Campaign neih ngei ni thin se tihte, Police Petrol Log Book te pawh mumal taka hman ve tawh nise tihte an ni hlawm a. Pawisa Note lem check na khawl Canara Bank ten an la nei lo chu nei ve ngei turin tih a ni bawk.

Lawngtlai District-ah hian Bank panga State bank of India, Canara Bank. HDFC Bank, Mizoram Rural Bank leh Mizoram Co-Operative Apex bank te an awm a. Mizoram Rural Bank hian Branch panga neiin State bank of India hian Branch pahnih a nei a, a dang hote hian Branch pakhat theuh an nei a ni.