Mizoram State Disaster Management Authority (SDMA) chu Chairman Pu Lal Thanhawla, Chief Minister kaihhruainain vawiin khan a office cabinet room-ah an thukhawm.

Meeting-ah hian Mizoram district hrang hranga khuanurel chhiatna thlengte sawihoin, chhawmdawlna tur sum ruahman mek anih thute an sawi a. Sum harsatna avangin duh anga chaka kal theih anih loh thute an sawi hmasa a ni. Meeting-ah hian sawiho tur leh meetingin a pawm atan agenda pakua chhawpchhuah a ni a. A hmasa berah sorkar-in chhiatna thleng thei a chhinchhiah piah lama state tinin an state theuh bika chhiat tawh theih list 14th Finance Commissionin siam tura rawtna a siam bawhzuina chu meeting hian a pawm a. Hetah hian chhiat tawh chhawmdawlna hi chhiat tawktu hian a eizawnna hna a thawh lai emaw, a kal lam emaw a haw lam emaw a thleng ani tur a ni a. Chhawmdawlna sum hi State Disaster Response Force (SDRF) atanga 10 % dah tur a ni. Disaster Management Act, 2005 in a sawi angin chhiatrupna thleng thei tih tlem, State Disaster Mitigation Fund siam a kum 2015 - 16 chhunga Rs.10 Crore tal dah rawtna pawh pawm a ni a. Silpauline leh Tarpauline semnaa alo buaipui man Rs.100 chhiat tawktute atanga lak thin tih tawp chungchang pawh SDRF thil tum nen a inkalh avangin pawm a ni a. Chhiat tawkte chhawmdawlna sum pek thuai an nih theih nan SDRF Fund atanga emergency fund siam pawh remtih a ni a. 14th FinanceCommissionin chhiatrupna thleng avanga chenna in chhe vek leh chhe nasa neitu hnena chhawmdawlna Rs.1,01,900/- pek a rawtna chungchangah meeting chuan in sakna hmanrua inanglo tak tak a awm avang leh a chhiat dan zirchian hmasak hnu ah pek zat tur chu siam nise tiin rawtna chu pawm a ni bawk a. Mizoram State Disaster Mamnagement Plan 2015 pawh pawm a ni.

Hengte bakah hian sorkar department tinin disaster management plan an neih, The Departmental Emergency Support Function Plan department 12 in SDMA a an thehluh te meeting hian a pawm bawk a. Administrative Training Institute a diasater management cell ah Deputy Director (Training) leh Assistant Director (Training/Operation) post siam remtih a ni bawk a. National Disaster Response Force Training Centre pawh 5th IR Battalion Centre, Lungverh atanga Central Training Institute (CTI) Sesawnga sawn rawtna pawh pawm a ni.

SDMA hi disaster management lama thuneitu sang ber a ni a. Chief Minister chu Chairman niin, Vice Chairman chu DM&R Minister a ni a. Member dang 7 awmin, chungte chu Minister te Home, Agriculture, Health &FW, PHE, UD&PA, leh LAD Minister te leh Pu Dominic Lalhmangaiha (Disaster Management Expert) an ni a. Chief Secretary chu Chief Executive Officer (ex-officio) a ni.