1655/2026-2027

Lawngtlai, 5th August 2026: Vawiin khan Lawngtlai Bawrhsap leh Chairman, District Disaster Management Committee- nibawk Pu Donny Lalruatsanga kaihruaiin a Office Chamber-ah Lawngtlai - 3 leh Electric Veng Lei tlahniam (Sinking Area) dinhmun leh hmalak dan tur sawihona neih a ni.

Pu Donny Lalruatsanga chuan Lawngtlai-III leh Electric Veng a lei tlahniam (Sinking Area)  kum 1995 aṭanga intan tawhin vawiin thlenga harsatna a thlente, chenna In thiah ngaite chu sawrkarin a hre reng tih sawiin, National Highway - in a paltlang bawk avangin chak taka hmalak reng a ni, a ti a. A bik takin kumin fur lai hian uluk zawka vil leh endik thin a pawimawh hle a ti. He lai lei tlahniam hian a huam zau hle a, Geology & Mining leh MZU lam atang pawhin zirchianna an lo nei tawh tih a sawi. Chairman chuan helai siamthatna tur hian SASCI kaltangin  Check Dam leh Drainage - te siam a nih tur thu a sawi a ni.

Khawtlang hruaitute hian Lei tlahniam vanga harsatna an tawh hrang hrangte, leh a siamthatna tura hmachhawp an neih te sawizauna an nei a. In leh lo bakah nunna hial chân  theihna a nih angin Lei tlahniam hian zual lam pan lo tura tha taka hnathawh a pawimawh hle tih an tarlang a. Tu pawhin a hna chu lo thawk se, khawtlang duh dan ang ngei a, tha taka thawk tura an duh thu an tarlang a. Thukhawm chuan Lei tlahniam huam chhung a zau hle a, SASCI atanga hnatawh a tawk zo dawn lo tih pawmtlangin, DPR mumal tak siama Mizoram sawrkar lamah thehluh leh ngei ni se an ti bawk a ni.

Lawngtlai III leh Electric Veng lei tlahniam hi kum 1995 aṭanga intan tawh niin, kum tin a che deuh reng a, tundinhmunah hian chenna In - 30 leh chhungkaw- 50 a nghawng mek a ni.

Thutkhawmah hian  AE, UD& PA, Lawngtlai - III leh Electric Veng VC leh YLA hruaitute bakah MJA Lawngtlai hruaitute an tel thei a ni.