2756/2026-2027

Lawngtlai, 21st October 2026: Vawiin khan Lawngtlai Bawrhsap Pu Donny Lalruatsanga chuan District Institute of Education and Training (DIET) Thingkah a tlawh a, Principal Pi Ngur Hming Liani Chinzah  leh thawktuten an lo dawngsawng a ni.

Pu Donny Lalruatsanga chuan Principal, Lecturer leh Staff - ten theihtawp an chhuahna kawngah lawmthu a sawi a. Lawngtlai District- in Zirna lama hmasawnna a neih theihna tura thawktu an nih angin, Zirtirtu training pek, D.El.Ed course, In-service training leh a dangah te theihtawp chhuah chhunzawm zel turin a chah a. Zirtirtu hna chu hna ropui ber pakhat a ni a, chumi tura zir mekten Zirtirtu tha tak ni tura tul leh pawimawhte hriatchian a pawimawh tak zet a ni, a ti. Zirlaite chu thiamna tak tak nei tur leh  hnathawk tlaka inzirchhuak tur te, min rintlak leh chhuanawm, ram leh hnam innghahna tlak ni tura bei fan fan turin a fuih a ni.

Incheina chungchang sawiin Pu Donny Lalruatsanga chuan mahni nihna mil leh zahawm taka incheithiam a tul hle a ti a. Chhungkaw tha din turin a  bul tan that a pawimawh hle a, chumi tura ruihtheih thil laka fihlim turin  zialaite a chah a. Mizorama HIV/AIDS hluar lutuk veiawm a tih thu sawiin, HIV/AIDS  laka fihlim tlat turin a fuih a. Vawiina zirlaite chu ram leh hnam innghahna pawimawh tak an nihna hriaa, ram nuam leh chhenfakawm, hnam ropui tak siamtu ni tura rilru siamfel turin a chah a ni. Bawrhsap chuan  Zirna hi ram leh hnam hmasawnna bulpui ber a ni tiin, khawvel changkang tak karah ram leh hnam rilrupua thahnem ngai taka thawkfo turin  chah nghal bawk.

Principal leh thawktute hian DIET, Thingkah in mamawh hrang hrang an neih te bawhrsap hnenah hian an lo thlen a. Pu Donny Lalruatsanga chuan an mamawhna a hriatthiampui tih sawiin, theih ang anga hmalak a nih tur thu a sawi a ni.

DIET, Thingkahah  hian tun dinhmunah Principal leh Lecturer - 10 awmin, zirlai - 101, an awm mek  bawk a ni.