2388/2026-2027

Lawngtlai, the 28th, September, 2026 : Vawiin chawhma dar 10:00 AM khan Lawngtlai Bawrhsap Pu Donny Lalruatsanga chuan a Office Chamber- ah 'FAO 100 Women Heroes in Agrifood Systems and Rural Development' zinga thlanchhuah Pi ZT. Lalrithangi (Pi Mari-i) lawmpuina neiin, chawimawina thuziak leh Rs. 10,000/- a hlan.

Pu Donny Lalruatsanga chuan kalkhawmte hnena lawmthu sawiin 'The Food and Agriculture Organization (FAO) of the United Nations, in International Year of Women Farmer 2026 denchhena 'FAO 100 Women Heroes in Agrifood Systems and Rural Development' an thlan chhuah zinga Strawberry hlawhtling taka chingtu, Pi ZT. Lalrithangi (Pi Mari-i), Sangau, Lawngtlai District, thlanchhuah ve a ni chu thinlung taka a lawmpui thu a sawi a. Mizo zingah chuan hetiang Award dawng hmasa ber tur a ni a, Pi ZT Lalrithangi thawhrimna leh inpekna a fakawm tak zet a ni, a ti. Midangte vei tlat mi a nih angin, midangte eizawnna tha tak a siamsak leh zel hia hmu zual em em a ni, a ti. Bawrhsap chuan Lawngtlai District- atanga Mizoram leh India ram tihmingthatu an awm chu District mipuite leh Mizoram pum tan thu lawmawm a ni, a ti a. Pi ZT. Lalrithangi (Pi Mari-i) hlawhtlinnaah hian zirtur tam tak a awm a, a bik takin hmeichhiate tan a entawn tur a tam zual tiin, Bawrhsap chuan Pi Marii chu thahnem ngai taka thawk chhunzawm zel turin a fuih nghal bawk.

Pi ZT Lalrithangi chuan 'FAO 100 Women Heroes in Agrifood Systems and Rural Development' zinga thlanchhuah a ni chu thinlung taka a lawm thu a sawi a.Tun dinhmunah Strawberry - a chin chhan ber a la tihlawhtling kimlo tih sawiin, a tharchhuah atanga hralhchhuah tura sawngbawl leh chu hmachhawpa a neih mek thu a sawi a.Hlawhtling turin thawhrimna piah lamah beidawng lova beih fan fan a tul fo thin tiin, a strawberry - tharte hrahchhuah theih tura a inbuatsaih mek thu a sawi bawk a ni.

He Chawimawina dawngtur hian India atanga mi pahnih langin, World Food Forum event, FAO Headquarters, Rome, Italy-a ah October 12-16 hian Award hi sem a ni dawn a. Pi ZT Lalrinthangi hi Ram hrang hrang 131 atanga Award dawng tlaka ngaih 600 chuang atanga mi 100 thlan chhuah zingah a tel a ni. Pi ZT. Lalrithangi hian strawberry chin kawngah taima takin hma a la a, a inpekna te, a phurna te, thawhrimna te leh chhuan awmzel tur tana entawntlak taka a thawh avangin, FAO-in Agriculture leh Rural Development lama hmeichhe ropui leh thawh hlawk 100 an chawimawi tur zingah a tel thei ta a ni. Amah hi Horti Fair, Mizoram 2026-a Lawngtlai Best Farmer a ni bawk a ni. Pi ZT Lalrithangi hian Strawberry huan hi kum 2024 khan bultanin, kumin hian bul Slsingkhat vel a chinga, a tharchhuah atangin Cheng Nuai 6 atanga Nuai sawm bawr vel a lalut mek bawk a ni.

Chawimawina hun hmannaah hian Addl.DC, SDO (Sadar), SDC, Superintendent, DC Office leh Chanchinbu mite an tel a ni.