2387/2026-2027

Lunglei, 2026 Mimkut Thla ni 28: 2 Mizo Battalion National Cadet Corps (NCC)-in 2nd Battalion Mizoram Armed Police (MAP) Complex, Luangmual, Lungleia September ni 19–28, 2026 chhunga ni 10 awh Combined Annual Training Camp (CATC-109) an buatsaih chu hlawhtling taka zawh fel a ni.

CATC-109 hi September ni 19, 2026 khan ṭan niin, Mizoram laili leh chhim lama sikul leh college hrang hranga NCC Junior Division (JD), Junior Wing (JW), Senior Division (SD) leh Senior Wing (SW) aṭangin cadet 214-in camp hi an chhim a. Ni 10 chhung hian cadet-te chuan sipai lâm (drill), silai leh ralthuam chelek, ram lem (map) en dan, ramhnuaia chettlat dan, infiam leh taksa sawi zawi, hruaitu ṭha ni tura thil pawimawh leh khua leh tuite mawhphurhna hrang hrang an zir a. Volleyball leh item hrang hranga intihsiakna buatsaih a nih bakah, Lunglei khawpui fanna leh War Memorial tlawhna hun hman a ni a. Mi thiam sawm bikte nen thupui hrang hrang zir hona leh sawi hona hun hman ṭhin a ni bawk.

CATC-109-ah hian 23 Assam Rifles Commandant Colonel Kishan Bal P. chuan cadet-te fuihna leh sipai (Armed Force)-a luh dan sawiin, 2nd Bn MAP Commandant Pu Francis Lalnuntluanga Ralte chuan cadet-te fuihna thu a sawi bawk a. Lunglei DIPRO Pu C. Lalhruaitluanga'n media pawimawhna leh media hman dan ṭha zirtirin, 23 Assam Rifles, 2nd MAP, Territorial Army, Information & Public Relations, Excise & Narcotics leh Mizoram Police Traffic Wing aṭangin cadet-te tana hriat tur pawimawh zirtirna hun hman ṭhin a ni bawk.

Camp kharnaah Camp Commandant Lt Col. Crossmawi L. Hmar chuan cadet-te chu an thathona, thu awihna leh hlawhtlinnaah a lawmpui thu sawiin, CATC-109 buatsaih nana an hmun hma leh hmanruate phal taka hmantirtu leh zo taka dawltu, 2nd MAP Commandant leh a thawhpuite chungah lawm thu a sawi a. Camp chhunga inelna leh thil tihna hrang hranga ti ṭhate lawmman sem a ni a. Cultural programme hlimawm tak nen camp hmawr hi bawk niin, cadet-te'n hnam lam, hnam zai leh an thiam thil chi hrang hrang an entir a ni.