4564/2025-2026

Lawngtlai, 21st February 2026: Chawnhu khuaa 'My Village My World' kalpui mekah Kum 2026 atana Faina leh Thianghlimna khuhhawnna chu vawiin khan Chawnhu kawn laiah neih a ni a. Lawngtlai Bawrhsap leh Chairman, My Village My World Programme Committee- nibawk chuan khuhhawnna hi a nei.

Pu Donny Lalruatsanga chuan kalkhawmte hnena lawmthu sawina neiin, kum 2026 atana Faina leh Thianghlimna beihpui chu lawm takin a hawng tih a sawi a. Chawnhu khua faina leh hmasawnna kawngah theihtawp chhuah zel a pawimawh hle tih sawiin vangtlang mipuite tha thlah lo turin a chah a. A bik takin ranvulh leh ruihhlo  khuahkhirh bakah  thingphun uar lamah tan lak zual a tul hle a ni, a ti. Bawlhhlawh paih kawngah fimkhur thar a tul hle a ti a, a bawmah chauh bawlhhlawh paih thin turin a fuih a. Chawnhu chu Lawngtlaiah District - chhunga khaw dangte  entawntlak ni thei tura theihtawp chhuah turin a sawm a ni. 

Bawrhsap chuan kawngpui, In leh lo leh vangtlang hmunte fai taka enkawl a tul hle a ti a. Hemi kawngah hian naupangte pawhin tih theih an nei sâng hle tiin bawlhhlawh chhar fai kawngah midangte kawhhmuhtu ni turin a fuih a. Faina leh thianghlimna inzirtir chu thil pawimawh tak a nih thu tarlangin,chak zawka kalpui a nih tur thu a sawi a. Sawrkarin Ruihhlo do beihpui a kalpui mek tih tarlangin, Lawngtlai district - ah pawh chak taka kalpui a nih thu a sawi a. Pu Donny Lalruatsanga chuan Lawngtlai District chhunga khua zawng zawngah  'Drugs Free Village' Campaign-  kalpui a nih tur thu a tarlang. Bawrhsap chuan kangmei ven kawngah tan lak thar a tul hle a ti a. Kangmei tichhuak lo tura inzirtirna chak taka kalpui a nih thu tarlangin, khawtlang mipuite kangmei ven kawngah thawhpuiah a sawm a ni. Pu Donny Lalruatsanga chuan Faina leh thianghlimna kawngah Chawnhu chu khaw dangte entawn tlak ni ngei turin duhsakna a hlan nghal bawk. 

Faina leh Thianghlimna puala hun hmannaah hian Chawnhu khawtlang mipuite an kal tha hle a, bawlhhlawh chhhar fai hnatlâng an nei nghal a ni. Vawiin hun hmanna hi Pu C. Lalbuatsaiha, VCP, chuan kaihruaiin Pu C. Vanlalpawlliana, President, YLA, Chawnhu Branch, chuan thutawi sawina a nei bawk a ni.