4563/2025-2026

Dated Aizawl, the 21st of February, 2026 : Tukin khan Pu Lalnghinglova Hmar, Minister, Sports & Youth Services Department leh Aizawl West II bialtu MLA ni bawk chuan Aizawl West Jt. YMA Field, Vaivakawn-a SASCI atanga cheng vaibelchhe 10 hmanga Artificial Football Turf phah tur chu a hmunah tlawhin, sawrkar official leh khawtlang hruaitute nen hmalak dan tur an rel. 

Minister Pu Lalnghinglova Hmar chuan thusawiin, Aizawl West Jt. YMA-ten an muala phullem phah an dil thu leh an dil laia pawisa a awm loh avanga tihsak nghal theih an nih loh thu a sawi a. Tunah sawrkarin hnathawhna tur sum a pek atanga phah theih tur a ni chu lawmawm a tih thu a sawi a. 

Sports Minister chuan sawi chhunzawmin artificial turf phah bakah sum awmdan azirin thil dang eng eng nge kan telh theih tihte, kan hawilam tur tichiang turin khawtlang hruaitu leh Jt. YMA nen sawiho a duh avanga a hmuna tlawh a nih thu a sawi a. Mizorama infiamna chawikan nan hman a nih theih nan leh sports association-te pawh duhsak turin YMA hotute nen an sawiho tawh thu a tarlang bawk. 

Tukina hmalakna tur sawiho zingah hian Jt. YMA lamin an ngaihpawimawh, field-a tui lut lo tura ven dan tur te, tui paihna (drainage) mumal tak siamna tur zirchiana, a hmunhma  -in a mil anga hnathawh te, gallery mumal tak a chung neia siam leh zana training neih theihna tur tawka light tha vuah te a tel a. Sawrkar, khawtlang hruaitu leh Jt. YMA te inrawna hmalak ho zel nise tiin rel a ni bawk. 

Tukina Jt. YMA Field, Vaivakawn tlawhnaah hian Pu Henry C. Lalrawnkima, Secretary, Mizoram State Sports Council leh MSSC officer-te, Vaivakawn Local Council, Jt. YMA hruaitute leh khawtlang hruaitute an tel a ni.