4856/2025-2026

Lawngtlai, the 17th March, 2026 : Vawiin chawhma dar 10:00 AM khan Deputy Commissioner,Lawngtlai Office Chamber- ah Bawrhsap Pu Donny Lalruatsanga kaihhruaiin Thaltlang khua leh Phawngpui National Park ramri chungchangah thukhawmna neih a ni.

Pu Donny Lalruatsanga chuan Phawngpui National Park hi Mizoram ang pawh a ngaihhlut a ni a, National Park- a puan theih hmun Lawngtlaiin a neih hi District tan pawh hian a chhuanawm hle a ni, a ti. Ramri chungchangah Thaltlang VC- te thu thlen pawh zahawm viau mahse, National Park a puan tawh ani a, puan a nih laia ramri chungchanga lungawih lohna a awm loh avangin tun din hmun ah chuan tih danglam theih a ni lo a ti a, kum 1997 ah State Notification a chhuak a, Pillar phun a ni a, a nihna ang tak a kum 30 chuang kal tawh anih avangin kan rin a ngai a ni a ti. A nih dan ang taka kalpui in thlak danglam theih a ni lo a ni a ti bawk. Sorkar thuchhuak zawmtu leh kalpui tu kan nih hi a ngai a ni a ti. Bawrhsap chuan Thaltlang khua tan pawh National Park avang hian hmasawnna kawng a inhawn zel a beisei a, hmasawnna tur hmachhawp pawh ruahman mek a ni a ti. Boundary chhinchhiahna tih fel loh a awm nih chuan LADC lam leh WildLife, Mizoram ten lo tih fel thuai nise a ti bawk.

Pu HC. Lalengkima, EM, Forest,etc. LADC pawh he thutkhawm ah hian telpuiin, Lawngtlai District hmangaiha, District thatna leh hmasawnna duh mi Bawrhsap kan nei hi lawmawm a tih thu sawiin Bawrhsap chungah lawmthu a sawi nghal a ni. Sorkar Gazetted a ni avangin tih danglam mai mai theih a ni lo a, a nih dan ang hian kan pawm tlan a ngai a ni a ti. Phawngpui National Park hi a hnai vaia khaw awm ten kan khua hmasawnna atana kan hman thiam a ngai a ni a ti bawk. Thaltlang khua tan pawh hmasawnna a awm zel theih nan Bialtu MDC nen pawh theih tawp chhuah an tum thu a sawi bawk a ni. LADC lam atanga ramri chungchang ah pawh hriattirna mumal tak tihchhuak thuai a nih tur thu a sawi bawk.

Thutkhawmna ah hian Thaltlang VCs lam atangin ramri chungchangah an dinhmun leh harsatna sawite ngaihthlak a ni a, Pu Marcellus Hunlawmawma, DCF, Wildlife Mizoram in thusawinna neiin Phawngpui National Park hi Gazetted in 1995 ah Preliminary Notification tihchhuah a ni thu leh 1997 ah Final Notification tih chhuah a nih thu leh 1999 ah Pilar phun a nih thu a sawi a, Sanctuary leh National Park a puan anih dawn a procedure hrang hrang tarlanna a nei bawk a ni.

He thutkhawm ah hian R.Lalmuanpuia, R.O, Phawngpui Wildlife, B.Lalrinmuanpuia, ACF, LADC, Lalrammawizuala, Dy. LAO leh Thaltlang VCs te an tel a ni.